ენდი რობერტსონი ლივერპულს ემოციურად ემშვიდობება

ლივერპულის ერთ-ერთი საუკეთესო მარცხენა მცველი, ენდი რობერტსონი, კლუბთან გამოსამშვიდობებლად ემზადება. კვირას, ბრენტფორდთან მატჩი ენფილდზე მისი ბოლო შეხვედრა იქნება.

შოტლანდიელი მცველი, რომელიც წლების წინ გავარდნილი ჰალიდან გადმოვიდა, მერსისაიდელთა მაისურით მოედანზე 377-ჯერ გავიდა, 9 ტიტული მოიგო და მოჰამედ სალაჰთან ერთად გუნდს საბოლოოდ ტოვებს.

გამოსამშვიდობებელი კვირის ფარგლებში რობერტსონმა მეგობრისგან და ყოფილი თანაგუნდელისგან, ტრენტ ალექსანდრ-არნოლდისგან ემოციური საჩუქარი მიიღო - 2019 წლის ჩემპიონთა ლიგის ტრიუმფის ამსახველი ფოტო. ორმა მფრინავმა მცველმა წლების განმავლობაში პრემიერ ლიგაში მცველების საგოლე გადაცემების რეკორდი ერთმანეთს არაერთხელ წაართვა.

მიმდინარე სეზონში მილოშ კერკეზის ტრანსფერის შემდეგ რობერტსონმა ძირითად შემადგენლობაში ადგილი დაკარგა და მეორე არჩევნად იქცა, თუმცა კლუბს პრეტენზიების გარეშე ემშვიდობება:

მივდივარ ყოველგვარი სინანულისა და წყენის გარეშე. კონტრაქტის ახალი პირობები არ შემოუთავაზებიათ და ყველაფერი წინასწარ განვიხილეთ. ვიცი, რომ ამ 9 წლის განმავლობაში ლივერპულისთვის მოედანზე ყველაფერი გავიღე. ეს კლუბი უნიკალურია და ის ყოველთვის მომენატრება.

რობერტსონმა იუმორით გაიხსენა ლივერპულში გატარებული პირველი თვეებიც, როდესაც სათამაშო დროის სიმცირის გამო იურგენ კლოპთან საუბარს უფრთხოდა. მისი თქმით, კრისტალ პალასთან სადებიუტო მატჩში გულშემატკივრებმა მისი სიმღერა მაშინვე იმღერეს, თუმცა კლოპმა ის ამის შემდეგ „ოთხი თვით კარადაში გამოკეტა“, სანამ ძირითადის მუდმივ წევრად აქცევდა.

ინტერვიუში შოტლანდიელმა ფეხბურთელმა კლუბის უახლეს ისტორიაში არსებულ უმძიმეს პერიოდზეც ისაუბრა, რომელიც დიოგო ჟოტას ტრაგიკულ გარდაცვალებას უკავშირდება. რობერტსონის თქმით, ამან გუნდზე უდიდესი გავლენა იქონია:

ზაფხულში რაც გადავიტანეთ, იმედი მაქვს, არცერთ გუნდს და პერსონალს არასოდეს დაატყდება თავს. კვირების განმავლობაში ფეხბურთი საერთოდ არ გვაინტერესებდა, ვარჯიშიც კი არავის გვინდოდა, თუმცა როგორც პროფესიონალებს, წინ სვლა უნდა გაგვეგრძელებინა.

ლივერპულიდან წასვლის შემდეგ რობერტსონს წინ დიდი გამოწვევა ელის - ამ ზაფხულს იგი შოტლანდიის ნაკრებს კაპიტნის სამკლაურით გაუძღვება მსოფლიო ჩემპიონატზე, სადაც ქვეყანა ბოლო 28 წლის განმავლობაში პირველად იასპარეზებს.