საქართველოს 21-წლამდე ნაკრები ევროპის ჩემპიონატის პირველ მატჩს 11 ივნისს, პოლონეთის წინააღმდეგ გამართავს.
მატჩის წინ გუნდის მთავარმა მწვრთნელმა, რამაზ სვანაძემ პრესკონფერენციაზე ისაუბრა.
"დღეს ჩვენთვის უდიდესი მნიშვნელობა აქვს, რომ 21-წლამდე ნაკრები უკვე მეორედ ვართ აქ, ეროვნული ნაკრებიც შარშან გასული იყო ევროპის ჩემპიონატზე და ეს არის დიდი სტაბილურობა, რომლისკენაც მივდივართ ყოველდღიური შრომით.
ამ სტაბილურობაში ძალიან ბევრი ადამიანია ჩართული, საერთო საქმე კეთდება და დარწმუნებული ვარ იმ ნაბიჯებით, რომელიც იდგმება ჩვენი მხრიდან, ეს სტაბილურობა შენარჩუნდება და კიდევ წინ წავიწევთ.
განვლილ გზას რაც შეეხება, რა თქმა უნდა, ძალიან სასიამოვნო იყო. მიუხედავად იმისა, რომ ეს ჩვენთვის მეორე ევროპის ჩემპიონატია, სულ სხვა გემო აქვს, როცა საკუთარი შრომით, ნერვებით, სტრესითა და დიდი ბრძოლებით, რომელიც ჩვენ გავიარეთ შესარჩევში, მოიპოვებ საგზურს. ეს სულ სხვაა ემოციურად და ასევე ზრდის გუნდს, რადგან მათ გავლილი აქვთ უკვე ძალიან ბევრი ბრძოლა.
ხვალ ველოდები იმ გუნდისა და ფეხბურთელების ხილვას, რომელსაც მე ვიცნობ თავისი კონკრეტული მიმართულებებით, ფილოსოფიით, იდენტობით და მენტალური მახასიათებლებით იმიტომ, რომ რა, რა და ჩვენ არასდროს გვაკლდა ბრძოლისუნარიანობა და მენტალური მხარე, რომელიც ყოველთვის ჭარბად იყო ჩვენში.
მინდა, რომ ხვალ ეს ყველაფერი პირველივე თამაშიდან გამოვლინდეს იმიტომ, რომ ხვალ უნდა ავიღოთ იმის ნაყოფი, რისთვისაც ვიბრძოდით. დადებითი ემოციებით ვართ ყველა, დანარჩენი თამაშზე გამოჩნდება." - რამაზ სვანაძის სიტყვებს ეროვნული ნაკრების გვერდი ავრცელებს.
საქართველოსა და პოლონეთის მატჩი 11 ივნისს, 23:00 საათზე დაიწყება.
ევრო 2025 - საქართველოს U21 ნაკრების 23-კაციანი შემადგენლობა ცნობილია
