„ეს ჩემი სტრატეგია იყო“ — ფონსეკამ ენდრიკის კრიტიკის მიზეზი განმარტა

ლიონის მთავარმა მწვრთნელმა, პაულუ ფონსეკამ განმარტა, თუ რატომ გამოთქვა უკმაყოფილება რეალიდან იჯარით აყვანილი 19 წლის თავდამსხმელის, ენდრიკის მიმართ.

მანამდე პორტუგალიელი სპეციალისტი ამბობდა, რომ ბრაზილიელისგან მეტს ელოდა და ის ვალდებული იყო, უკეთ ეთამაშა.

კვირას, ლორიანის წინააღმდეგ გამართულ მატჩში (2:0), ენდრიკმა საგოლე გადაცემა მიითვალა, რაც მწვრთნელისთვის ნიშანი იყო, რომ მისმა სტრატეგიამ იმუშავა:

„მწვრთნელისთვის აუცილებელია ისეთი სტრატეგიის პოვნა, რომელიც მოთამაშეების რეაქციას გამოიწვევს — მე სწორედ ეს გავაკეთე. ეს იმიტომ ვთქვი, რომ მისი პროვოცირება მომეხდინა და შედეგიც დავინახე.

დიახ, ჩვენ ვისაუბრეთ. ენდრიკი ახალგაზრდაა, ძალიან პოზიტიური ადამიანი, მისი ხასიათი მომწონს. 19 წლის ასაკში ის ევოლუციისა და ცვლილებების პერიოდს გადის. ჩვენ ვილაპარაკეთ და ყველაფერი რიგზეა“, — განაცხადა ფონსეკამ.

ბოლო 11 მატჩში ბრაზილიელმა მხოლოდ ერთი გოლის გატანა მოახერხა, თუმცა ფონსეკა იმედოვნებს, რომ ეს შედეგიანი გადაცემა მისი ფორმაში დაბრუნების დასაწყისი იქნება.