ესპანეთისა და საქართველოს ეროვნული ნაკრებები 2025 წელს კიდევ ორ ურთიერთშეხვედრას გამართავენ. აქამდე გუნდებს 8-ჯერ აქვთ ნათამაშები - ესპანელებმა 7-ჯერ მოიგეს, ჩვენ - ერთხელ. ესპანეთმა ბოლო ოთხი შეხვედრა ჯამში 18:3 მოიგო, სულ ბოლოს ევრო 2024-ის 1/8 ფინალში - 4:1.
11 ოქტომბერი მათი წლევანდელი პირველი ურთიერთშეხვედრის თარიღია - ვილი სანიოლის გუნდი ფურია როხას ელჩეში, მანუელ მარტინესის სახელობის სტადიონზე ეწვევა.
ევროპის ჩემპიონმა ესპანეთმა, რომელიც ამჟამად ფიფა-ს რეიტინგში პირველ ადგილზეა, მსოფლიოს 2026 წლის ჩემპიონატის შესარჩევი ციკლი შესანიშნავად დაიწყო - თურქეთი და ბულგარეთი, ორივე სტუმრად, ჯამში 9:0 დაამარცხა.
თურქეთის 6:0 განადგურება განსაკუთრებით თვალშისაცემი იყო. საერთოდ, 1993 წლის მარტიდან მოყოლებული ესპანელებს მსოფლიოს შესარჩევზე მხოლოდ 1 წაგება აქვთ (58 მოგება და 14 ფრე), თანაც, საკუთარ მოედანზე მსოფლიო ჩემპიონატის საკვალიფიკაციო მატჩებში არასდროს დამარცხებულან!
ამ ფანჯრის პერიოდში, საქართველოს ნაკრებს თურქეთში გასვლითი მატჩიც ელის, რაც მსოფლიო ჩემპიონატის ფინალურ ეტაპზე მოხვედრისთვის საბრძოლველად, ამ კვირას გადამწყვეტ პერიოდად აქცევს.
თურქეთთან საშინაო მატჩში პირველი ტურის მარცხი, შესაძლოა, ამ მხრივ ძალიან ძვირი დაჯდეს, თუმცა ვილი სანიოლის შეგირდებმა ბულგარეთის დამარცხება მაინც მოახერხეს და ჯერჯერობით ცხრილის მე-2 ადგილს იკავებენ.
ჯვაროსნები მსოფლიო ჩემპიონატის შესარჩევი ეტაპის ბოლო წლების შედეგებით კმაყოფილები ვერ იქნებიან - ბოლო 40 მატჩიდან მხოლოდ 3 მოიგეს (13 ფრე და 24 წაგება).
რეალ სოსიედადის კაპიტანი, მიკელ ოიარსაბალი ესპანეთის ნაკრების საყრდენ ფიგურად იქცა - ბოლო ხუთ სანაკრებო მატჩში 8 გოლში (4 გოლი და 4 ასისტი) მიიღო მონაწილეობა. ქართველთა მხარეს შესანიშნავ ფორმაშია გიორგი მიქაუტაძე, რომელმაც ბოლო 6 სანაკრებო შეხვედრაში 8 გოლი შექმნა - 7 გოლი და 1 ასისტი. მიქაუტაძემ უკანასკნელ ორ საკლუბო მატჩში იუვენტუსსა და რეალს გაუტანა.
ესპანელებს საქართველოსთან მატჩისას 7-კაციანი დანაკლისი აქვთ - ლუის დე ლა ფუენტეს ლამინ იამალის, როდრის, ფაბიან რუისის, დანი კარვახალის, დინ ჰაუსენის, ფერმინ ლოპესისა და ნიკო უილიამსის გამოყენების საშუალება არ აქვს.
საქართველოს გიორგი ჩაკვეტაძე აკლია, ესპანეთთან ასევე ვერ ითამაშებს ლუკა ლოჩოშვილი, რომელსაც დისკვალიფიკაცია აქვს, თუმცა თურქეთთან უკვე ხელმისაწვდომი იქნება. ხვიჩა კვარაცხელია ბოლო საკლუბო მატჩებში ტრავმიანობდა, მაგრამ სანაკრებო მატჩებს მზადყოფნაში ხვდება.
მსოფლიოს 2026 წლის ჩემპიონატის საკვალიფიკაციო ეტაპის ეგიდით, ესპანეთი და საქართველო 11 ოქტომბერს, ელჩეში, მანუელ მარტინესის სახელობის სტადიონზე ითამაშებენ.
მატჩს იმსაჯებს ლიეტუველი მანფრედას ლუკიანჩუკასი, რომელსაც VAR-ის ჯიხურიდან პორტუგალიელი ტიაგუ მარტინში დაეხმარება.
