ეთერ ლიპარტელიანი ევროპის ვიცე-ჩემპიონია!

ძიუდოში ევროპის ჩემპიონატის მეორე დღეს ფინალურ ბლოკში ორმა ქართველმა იასპარეზა - ეთერ ლიპარტელიანმა (-57 კგ) და ლაშა შავდათუაშვილმა (-73 კგ).

ლიპარტელიანმა პირველ შეხვედრაში IJF-ის დროშის ქვეშ მოასპარეზე დარია კურბონმამადოვას იუკოთი მოუგო და 1/4 ფინალში გავიდა, სადაც მისი მეტოქე შვეიცარიელი ბინდა ნდიაე იყო.

ეთერმა 1/4 ფინალში იპონით იმარჯვა და 1/2 ფინალის საგზური მოიპოვა, სადაც ისრაელის წარმომდაგენელ ტიმნა ნელსონ ლევის იუკოთი მოუგო და ფინალში გავიდა.

ლიპარტელიანი ოქროს მედლისთვის ბრძოლაში გერმანელ სეია ბელჰაუსს დამარცხდა და ევროპის ჩემპიონატზე ვერცხლის მედალი მოიპოვა. ეს ეთერისთვის ევროპის ჩემპიონატებზე მე-4 მედალია - 2022 და 2024 წლებში მან ბრინჯაოს, ხოლო 2023 წელს ოქროს მედალი დაიმსახურა.

რაც შეეხება ლაშა შავდათუაშვილს, მან პირველ ეტაპზე შიდოებით მოუგო ჩეხ კარიმოვს და მომდევნო ეტაპზე გავიდა, სადაც თურქ ბილალ ჩილოღლუს ასევე შიდოებით აჯობა.

შავდათუაშვილმა 1/4 ფინალიში, 16 წუთიან ბრძოლაში იუკოთი მოუგო კოსოვოელ აკილ ჯაკოვას და 1/2 ფინალში გავიდა, სადაც იტალიელ მანუელ ლომბარდოსთან ვაზარით წააგო.

ლაშა ბრინჯაოს მედლისთვის ფრანგ ჟოან-ბენჟამინ გაბას დაუპირისპირდა და დაძაბულ ბრძოლაში დამარცხდა.

დღეს ასევე იასპარეზეს ნინო ლოლაძემ (-57 კგ) და ეთერ ასკილაშვილმა (-57 კგ). ლოლაძემ პირველ ეტაპზე ბულგარელი სნეზანა გრამატიკოვა იპონით დაამარცხა და მომდევნო ეტაპზე გავიდა, სადაც დაძაბულ ბრძოლაში დამარცხდა სერბ მარიცა პერისიჩთან.

ეთერ ასკილაშვილი კი პირველივე ეტაპზე ნიდერლანდელ გეკე ვან დენ ბერგთან დამარცხდა და ასპარეზობას გამოეთიშა.

გიორგი სარდალაშვილი ევროპის ჩემპიონია!