ევრო 2026 - დღეს ფუტსალის ნაკრებს ევროპის ჩემპიონატზე პირველი მატჩი აქვს

საქართველოს ფუტსალის ეროვნული ნაკრები ევრო 2026-ის პირველ მატჩს 21 იანვარს, რიგაში ტურნირის მასპინძელ ლატვიის ნაკრებთან გამართავს.

საქართველოს ნაკრებმა შეხვედრის მასპინძელ არენა რიგას დარბაზში ივარჯიშა. საწვრთნელი პროცესის დაწყებამდე საქართველოს ნაკრების მთავარმა მწვრთნელმა, ავთანდილ ასათიანმა ტრადიციული მატჩისწინა პრესკონფერენცია ჩაატარა.

"დადგა ის მომენტი, რისთვისაც ბოლო ორი წლის განმავლობაში, ამხანაგურ თუ შესარჩევ მატჩებში ყველაფერს ვაკეთებდით. ვფიქრობ, ჩემი გუნდი მზად არის ხვალინდელი თამაშისთვის. რთული მატჩები გვექნება, მაგრამ ჩვენ შეგვიძლია სირთულეების დაძლევა.

პირველი მატჩი განსაკუთრებით მნიშვნელოვანია. ლატვიის ნაკრები ბოლო წლებში ძალიან პროგრესირებს და კვალიფიციური მწვრთნელი ჰყავს", - აღნიშნა ასათიანმა.

ასათიანთან ერთად, პრესკონფერენციაზე იმყოფებოდა ნაკრების კაპიტანი, ირაკლი თოდუა, რომელმაც გუნსში არსებულ განწყობაზე გაამახვილა ყურადღება.

"შესანიშნავი გარემოა. ევროპის ჩემპიონატს ფიზიკურად და მენტალურად სრულ მზადყოფნაში ვხვდებით. ყველაფერს გავაკეთებთ, რომ პირველი 3 ქულა მოვიპოვოთ და ტურნირი წარმატებით დავიწყოთ.

ქართული სული ჰქვია იმ ყველაფერს, რაც ამ გზის თანმდევია, რამაც აქამდე მოგვიყვანა. ვეცდებით, ახლა უკვე ევროპის ჩემპიონატზე გავაგრძელოთ ჩვენი წარმატებული სვლა და ჯგუფიდან გავიდეთ", - განაცხადა თოდუამ.

ლატვიისა და საქართველოს ფუტსალის ნაკრებთა მატჩი თბილისის დროით 22:00 საათზე დაიწყება - პირდაპირ რეპორტაჟს საქართველოს პირველი არხი შემოგვთავაზებს.