სამშაბათს მადრიდის რეალის სატრანსფერო გეგმებთან დაკავშირებით სიტუაცია შესაძლოა მაქსიმალურად გამწვავდეს.
კლუბის პრეზიდენტმა, ფლორენტინო პერესმა დააანონსა, რომ მზად არის ახალი ვარსკვლავის შესაძენად 150 მილიონი ევროს ოდენობის მეგა-შეთავაზება გააკეთოს. მთავარი კითხვა კი ასე ჟღერს: იქნება ეს წინადადება მიუნხენის ბაიერნის ფრანგი შემტევის, მაიკლ ოლისესთვის, თუ მადრიდელები სხვა სამიზნეზე გადაერთვებიან?
გასულ სეზონში ოლისემ გერმანულ გრანდში ფენომენალურად ითამაშა და ევროპის ერთ-ერთ ყველაზე მოთხოვნად მოთამაშედ იქცა, რის გამოც პერესის გალაქტიკოს საარჩევნო სიას ჩაუდგა სათავეში. Sky-ის ცნობით, ოფიციალური ნაბიჯის გადადგმა სწორედ სამშაბათს იგეგმება.
ბაიერნის პოზიცია თვეებია უცვლელია - კლუბის პრეზიდენტმა ჰერბერტ ჰაინერმა საჯაროდ განაცხადა, რომ 24 წლის ფეხბურთელი არ იყიდება და ის მიუნხენელთა მომავლის პროექტის უმნიშვნელოვანესი ნაწილია.
ამ წინააღმდეგობის გამო პერესი რთული დილემის წინაშე დგას: თუ რეალი შეთავაზებას გააკეთებს და ბაიერნისგან მყისიერ უარს მიიღებს, პრეზიდენტის ხმამაღალი წინასაარჩევნო დაპირება ჩავარდება. სწორედ ამიტომ, ესპანურ მედიაში აქტიურად იწერება, რომ სამეფო კლუბმა შესაძლოა გეგმები ბოლო მომენტში შეცვალოს და 150-მილიონიანი წინადადება ატლეტიკო მადრიდის ხულიან ალვარესისკენ გადაამისამართოს, რაც ბევრად უფრო რეალისტური სატრანსფერო მიზანი ჩანს.
