გიორგი გაგუას მორიგი აღიარება სლოკავეთის ჩემპიონატში

დუნაისკა სტრედას 24 წლის ქართველი თავდამსხმელი, გიორგი გაგუა სლოვაკეთის ჩემპიონატში სექტემბრის თვის საუკეთესო ფეხბურთელის ჯილდოზე წარადგინეს.

გასულ თვეში ქართველმა ლეგიონერმა ორი გოლის გატანა და ერთი ასისტის გაკეთება შეძლო, რითაც ტურნირის ორგანიზატორების ყურადღება მიიქცია. ჩემპიონატის ოფიციალურ გვერდზე ხაზგასმით აღნიშნეს, რომ გაგუა გუნდის შეტევის ხაზში ერთ-ერთი საკვანძო ფიგურაა და დუნაისკა სტრედას წარმატება მხოლოდ სხვა ლიდერებზე არ არის დამოკიდებული.

თვის საუკეთესო მოთამაშეს შვიდი ექსპერტისგან შემდგარი სპეციალური ჟიური გამოავლენს. გიორგისთან ერთად ამ პრესტიჟული სტატუსისთვის კიდევ ოთხი ფეხბურთელი - ფაბიან ბზდილი, რიჩარდ ლუდჰა, ალექსა მარაში და ანდრაზ შპორარი იბრძოლებს.

მიმდინარე სეზონში გაგუას სტატისტიკა მართლაც შთამბეჭდავია: ყველა ტურნირზე ჩატარებულ 13 შეხვედრაში მის ანგარიშზე უკვე 6 გოლი და 6 შედეგიანი გადაცემაა. რაც მთავარია, მისი აქტიური დახმარებით დუნაისკა სტრედა 20 ქულით სატურნირო ცხრილს ლიდერობს.