"გოლი, ასისტი, ძელი! საუკეთესო იყო" - ადგილობრივი გამოცემა კვერნაძეზე

იტალიური ფროზინონეს ქართველი შემტევი, გიორგი კვერნაძე ბრწყინვალე ფორმაშია და სერია B-ს 25-ე ტურში კიდევ ერთი გამორჩეული შეხვედრა ჩაატარა.

ქართველმა სპეციას წინააღმდეგ ჯერ გოლი შეაგდო, შემდეგ კი საგოლე პასი გააკეთა. მისმა გუნდმა 2:0 გაიმარჯვა, სერია A-ში გადასასვლელ მე-2 ადგილზეა და ლიდერ ვენეციას 1 ქულით ჩამორჩება.

ადგილობრივი გამოცემა Ale FROSINONE-ს მიხედვით, კვერნა ორივე გუნდის რიგებში საუკეთესო იყო და შეფასებად 10-დან 8 ბალი დაიმსახურა: "გოლი, ასისტი, ძელი და რამდენიმე საინტერესო პასი თანაგუნდელებს. საუკეთესო ფეხბურთელი", - წერს გამოცემა ქართველის შესახებ.

23 წლის კვერნაძეს სერია B-ს ბოლო 6 ტურში 6 საგოლე მოქმედება აქვს - 3 გოლი და 3 ასისტი. 

გიორგი ფროზინონელთა რიგებში 2023 წლის ზაფხულში გადავიდა - მას შემდეგ გუნდის მაისურით ჩატარებულ 67 მატჩში 9 გოლი და 9 საგოლე გადაცემა აქვს.