გონსალო: "მცირე სათამაშო დრო? ბუნებრივია — მბაპე მსოფლიოს საუკეთესო ფეხბურთელია"

მადრიდის რეალის თავდამსხმელმა გონსალო გარსიამ კილიან მბაპესთან კონკურენციაზე ისაუბრა.

ლა ლიგის 19-ე ტურში რეალმა 5:1 მოიგო, 21 წლის ფეხბურთელმა კი ჰეთ-თრიქი შეასრულა. მბაპემ შეხვედრა ტრავმის გამო გამოტოვა.

მბაპეს არყოფნით გამოწვეულ ზეწოლაზე:

მე პრესას არ ვკითხულობ. ეს მადრიდის რეალია — აქ კონკურენცია მაქსიმალურია და ვიცი, რომ მბაპეს ბუნებრივი შემცვლელი ვარ. თუმცა მთავარი მწვრთნელი და ყველა თანაგუნდელი ყოველთვის თავდაჯერებულობას მმატებენ, რათა მოედანზე მაქსიმუმი გავაკეთო.

იმაზე, რომ მცირე სათამაშო დრო აქვს:

მართალია, ცოტა წუთს ვიღებ, მაგრამ ეს იმიტომ ხდება, რომ ჩემ წინ მბაპეა, რომელიც შთამბეჭდავ სეზონს ატარებს. ის პრაქტიკულად ყოველ მატჩში გოლს იტანს. ის მსოფლიოს საუკეთესო ფეხბურთელია, ამიტომ ყურადღება საკუთარ თავზე უნდა მქონდეს მიმართული და ყველა ვარჯიშზე მაქსიმალურად უნდა ვიშრომო.

ჩემი მიზანია, მზად ვიყო იმ მომენტებისთვის, როცა ასეთი შანსები მეძლევა, — განაცხადა გონსალო გარსიამ.