IJF: "რუს სპორტსმენებს საკუთარი დროშით გამოსვლის უფლება მიეცემათ"

ჯუდოს საერთაშორისო ფედერაციამ (IJF) გამოაცხადა, რომ რუს სპორტსმენებს საკუთარი ეროვნული დროშით გამოსვლის უფლება კვლავ მიეცემათ.

„ჯუდოს საერთაშორისო ფედერაციამ (IJF) მნიშვნელოვანი გეოპოლიტიკური ზეწოლის პერიოდში მაღალი პასუხისმგებლობით იხელმძღვანელა, რათა უზრუნველეყო ჯუდოს ოჯახში ერთიანობის შენარჩუნება და ყველა ქვეყნის სპორტსმენისთვის უსაფრთხოებისა და სამართლიანი შეჯიბრების პირობები.

უკანასკნელი მოვლენების გათვალისწინებით, მათ შორის ბელარუსი სპორტსმენებისთვის სრული ეროვნული წარმომადგენლობის აღდგენით, IJF მიიჩნევს, რომ ახლა შესაფერისი დროა, რუსი სპორტსმენების მონაწილეობაც თანაბარ პირობებში მოხდეს.

ისტორიულად, რუსეთი ერთ-ერთი წამყვანი ქვეყანა იყო მსოფლიო ჯუდოში და მათი სრული დაბრუნება ყველანაირად გააძლიერებს კონკურენციას ყველა დონეზე.“ - წერია IJF-ის განცხადებაში.

2022 წლის მარტში, IJF-მა ბელარუსი და რუსეთის სპორტსმენების მონაწილეობა მას შემდეგ შეაჩერა, რაც მოსკოვმა, მინსკის დახმარებით, უკრაინაში სრულმასშტაბიანი შეჭრა დაიწყო. იმავე წლის ივნისიდან, ამ ქვეყნების ძიუდოისტებს ნებადართული ჰქონდათ ნეიტრალური დროშით გამოსვლა.

ორივე ქვეყნის სპორტსმენებს ახლა თავიანთი ეროვნული სიმბოლოებით გამოსვლა მომდევნო დიდ ღონისძიებაზე, მსოფლიო ჩემპიონატზე შეეძლებათ, რომელიც მიმდინარე წლის 13–20 ივნისს გაიმართება.