ინგლისურმა გრანდმა ანდრია ბართიშვილს შეთავაზება გაუკეთა

არსენალმა ანდრია ბართიშვილის ტრანსფერზე წინასწარი კონტრაქტის შეთავაზება გააკეთა.

BBC Sport-ის ცნობით, მეთოფეებმა 17 წლის შემტევის მიმართ ინტერესი გააძლიერეს და სურთ, რომ ის ლონდონში წლის ბოლოს ჩავიდეს, როდესაც მის ამჟამინდელ კლუბ კოლხეთთან კონტრაქტი ამოეწურება.

ფეხბურთელთან დაახლოებული წყაროების ცნობით, ბართიშვილს, რომელიც ამჟამად იჯარით იბერია 1999-ში თამაშობს, სხვა ვარიანტებიც აქვს და ჯერ არ გადაუწყვეტია, სად გააგრძელებს კარიერას.

ბართიშვილის მიმართ ინტერესს ლივერპულსა და იუვენტუსსაც მიაწერენ.

არსენალის მხრიდან ბართიშვილის ტრანსფერზე მუშაობას სპორტული დირექტორის, ანდრეა ბერტას ასისტენტი მაურიციო მიკელი ხელმძღვანელობს.

მიკელის ხვიჩა კვარაცხელიას აღმოჩენაში მნიშვნელოვანი წვლილი მიუძღვის, იმ პერიოდში ის ნაპოლიში მთავარი სკაუტის პოზიციაზე მუშაობდა.

არსენალში ან პრემიერ ლიგის ნებისმიერ სხვა კლუბში გადასვლის დასასრულებლად ბართიშვილს შესაბამისი საერთაშორისო ნებართვის მიღება დასჭირდება.