"ინსტინქტურად ვმოქმედებდი" - მერაბი თავდასხმის დეტალებს იხსენებს

მინდია წიკლაურთან ინტერვიუში მერაბ დვალიშვილმა აბუ-დაბიში მომხდარი დაპირისპირების დეტალები გაიხსენა.

კითხვაზე, თუ რა იგრძნო პირველად, როდესაც მოულოდნელი თავდასხმა დაიწყო, დვალიშვილმა აღნიშნა, რომ მომხდარს საერთოდ არ ელოდა და სიტუაციაში გარკვევა ინსტინქტურად მოუწია:

როგორც იცით, საქართველოში ვიყავი 1-2 დღე, დარბაზი მოვინახულე, სადაც ჩემს MMA აკადემიას ვხსნი, შემდეგ აბუ-დაბიში დავბრუნდით და ინტერვიუს დასაწყებად ვემზადებოდი. მაგ მომენტში რაც მახსოვს, უკან მოვიხედე და დავინახე უმარი.

როგორც კი ხელი მომხვდა, ფეხიც მომხვდა და მივხვდი, რომ ბევრი იყვნენ. ზუსტად არ მახსოვს, მაგრამ თურმე ჩემს უკან იყვნენ და მე სახე დავიფარე, ამიტომ ვერ ვხედავდი, უკან რა ხდებოდა, თუმცა მივხვდი, რომ მარტო არ იყო, ბევრნი იყვნენ და ეს ყველაფერი დაგეგმილი იყო.

დვალიშვილმა ასევე განმარტა მომენტი, როდესაც დაპირისპირების დასაწყისში იგი მეგობარმა, საბა ლაზიშვილმა გააკავა:

ინსტინქტურად ვმოქმედებდი, მაგრამ საბამ გულში ჩამიკრა და ვუთხარი, გამიშვი, ძმა-თქო. საბა ტელეფონში იყურებოდა, ვერ დაინახა, რა ხდებოდა და მანაც ინსტინქტურად იმოქმედა. საბამ გამიშვა ხელი, როგორც კი ვუთხარი და რადგან ბევრნი იყვნენ, თავიდან ქაოსურად დავიწყე ბრძოლა.