18 წლისა და 59 დაპირისპირების შემდეგ, მე-60 მატჩი ნადალსა და ნოვაკ ჯოკოვიჩს შორის შესაძლოა უკანასკნელი გამოდგეს.
საინტერესოა, რომ დიდი შანსია, ამ ორი უდიდეს ჩოგბურთელს შორის ყველაფერი დასრულდეს სწორედ იქ, სადაც დაიწყო.
2006 წლის პარიზში, 20 წლის რაფა ნადალი როლან გაროსის 1/4 ფინალში თავის კარიერაში პირველად დაუპირისპირდა 19 წლის ნოვაკ ჯოკოვიჩს. პირველი ორი სეტი ესპანელმა 6:4 6:4 მოიგო, შემდეგ კი სერბმა თამაშის გაგრძელება ვეღარ მოახერხა და დანებდა.
მას შემდეგ, ჩოგბურთელებმა ერთმანეთში 59 დაპირისპირება გამართეს და უპირატესობა მცირედით, მაგრამ ნოვაკის მხარეს არის: 30-29. ხვალ, პოტენციურად მათ შორის უკანასკნელ დაპირისპირებაში, რაფას შანსი ექნება რომ სრული პარიტეტი აღადგინოს, ან კარიერის მთავარ კონკურენტს საბოლოოდ მისცეს ურთიერთშეხვედრებში წინ ყოფნის საშუალება.
ჩოგბურთელებს შორის ბოლო 5 გამართული მატჩიდან 4 სწორედ თიხის კორტებზე გაიმართა, ბოლო ორი შეხვედრა კი იმავე პარიზის კორტებზე, სადაც ახლა ოლიმპიადა იმართება. 2021-ში გამარჯვება ნოვაკმა იზეიმა, 2022-ში კი რაფამ რევანში აიღო და ჯერჯერობით მათი ბოლო დაპირისპირება თავის სასარგებლოდ დაასრულა.
ნადალისა და ჯოკოვიჩის ურთიერთშეხვედრების დიდებული ისტორიის პოტენციური ბოლო ფურცელი ხვალ, 29 ივლისს, პარიზის ცენტრალურ კორტზე დაიწერება.
