ამერიკის ღია პირველობის 2026 წლის გათამაშება ჰიპერ სენსაციით დაიწყო.
დიდი სლემის ტურნირების 24-გზისა და უშუალოდ US Open-ის 4-გზის ჩემპიონმა, ნოვაკ ჯოკოვიჩმა გამოსვლა პირველსავე წრეში დაასრულა.
სერბი ლეგენდა მსოფლიოს 49-ე ჩოგანს, არგენტინელ მარიანო ნავონეს ხვდებოდა და სეტებში 2:1-ს ამარცხებდა, თუმცა შემდეგ ფეხის კუნთების კრუნჩხვები დაეწყო, შეცდომებს კიდევ უფრო უმატა და დარჩენილ გეიმებში ფაქტობრივად ბრძოლა აღარც ყოფილა - 6:7; 7:5; 6:4; 2:6; 1:6.
ნოვაკმა ბოლო ორ სეტში 29, ხოლო ჯამში 70 უნებლიე შეცდომა დაუშვა, რაც თითქმის 18 გეიმის ტოლფასია.
"ვფიქრობ, აშკარა იყო, რომ კორტზე საშინელი შეგრძნებები მქონდა. არ მინდა, მარიანოს გამარჯვება ძალიან დავაკნინო, ვულოცავ მას, კარგი ბიჭი და მებრძოლია, მაგრამ ჩემი თავით სიამოვნებას ვერ ვიღებდი.
ეს არის ის, რაც წელს თითქმის ყველა მატჩში მემართებოდა - ღებინება.შემდეგ მთელი სხეული მიკანკალებს, კრუნჩხვები და ტკივილი მეწყება, ზურგი და მხარი ბოლოს უბრალოდ მეკუმშება და ვეღარ ვჩერდები", - თქვა ჯოკოვიჩმა.
39 წლის ჯოკოვიჩმა, დიდი სლემის ტურნირნირების ეგიდით, პირველი წრის შეხვედრა 2006 წლის შემდეგ პირველად წააგო (მარიანო ნავონე მაშინ 5 წლის იყო), ხოლო უშუალოდ US Open-ზე ის პირველი რაუნდიდან აქამდე არასდროს გავარდნილა.
რაც შეეხება 25 წლის მარიანო ნავონეს, მას კარიერაში ერთადერთი ტიტული აქვს მოგებული (ATP-ის 250-ქულიან ტურნირზე), დიდ სლემებზე კი საუკეთესო შედეგი მე-3 წრეა (2025-ის როლან გაროსზე).
არგენტინელი მომდევნო წრეში სტენ ვავრინკასა და მატეო ბერეტინის მატჩში გამარჯვებულს შეხვდება.
21-წლიან კარიერაში რამდენჯერ აქვს წაგებული ჯოკოვიჩს დიდი სლემის პირველ წრეში?
