ირანში გენდერული დისკრიმინაციის ახალი, უპრეცედენტო შემთხვევა დაფიქსირდა - ირანის საფეხბურთო ლიგის ორგანიზაციის გადაწყვეტილებით, მამაკაცებს ქალთა ფეხბურთის მატჩებზე დასწრება ოფიციალურად აეკრძალათ.
გასულ თვეში კლუბებისთვის გაგზავნილ წერილში (რომლის ავთენტურობაც გამოცემა The Athletic-მა დაადასტურა) პირდაპირ წერია, რომ ქალთა მატჩების მასპინძელ სტადიონებზე მამაკაცების ყოფნა დაუშვებელია და წესის დარღვევის შემთხვევაში, პასუხისმგებლობა მასპინძელ კლუბს დაეკისრება.
მართალია, ტექნიკურად მსგავსი აკრძალვა ადრეც არსებობდა, თუმცა ის არ ვრცელდებოდა სამწვრთნელო შტაბზე, ოფიციალურ პირებზე, ჟურნალისტებსა და ფეხბურთელთა ოჯახის წევრებზე. ახალი რეგულაციით კი ეს გამონაკლისებიც უქმდება.
ეს გადაწყვეტილება პირდაპირ არღვევს ფიფას წესდებას, სადაც მკაცრადაა გაწერილი, რომ სტადიონზე შესვლისას გენდერული ნიშნით დისკრიმინაცია დასჯადია და შესაძლოა, ქვეყნის ორგანიზაციიდან დროებით მოკვეთა ან სრულად გარიცხვა გამოიწვიოს.
საერთაშორისო უფლებადამცველმა ორგანიზაციებმა (Human Rights Watch, Amnesty International, Sport & Rights Alliance) უკვე მიმართეს მსოფლიო ფეხბურთის მმართველ ორგანოს და საკუთარი წესდების აღსრულებისკენ მოუწოდეს. Sport & Rights Alliance-ის დირექტორის, ანდრეა ფლორენსის განცხადებით, ირანი დისკრიმინაციის ახალ გზებს ეძებს, რასაც მკაცრი რეაგირება უნდა მოჰყვეს.