ისტორიაში მეოცედ - ლივერპული ინგლისის ჩემპიონია!

ინგლისის პრემიერ ლიგის 34-ე ტურში ლივერპულმა ენფილდზე ტოტენჰემი მიიღო. მერსისაიდელებს ჩემპიონობისთვის ამ მატჩში ქულა სჭირდებოდათ, თუმცა მათ მეტოქე 5-1 გაანადგურეს და საჩემპიონო 3 ქულა მოიპოვეს.

შეხვედრაში ანგარიში მე-12 წუთზე ტოტენჰემმა დომინიკ სოლანკეს გოლით გახსნა, თუმცა მასპინძლებმა პირველივე ტაიმში შეძლეს სიტუაციის მოტრიალება.

მე-16 წუთზე ლუის დიასმა გაათანაბრა ანგარიში, 24-ე წუთზე ალექსის მაკ ალისტერის შორეული გასროლით გავიდან წინ ლივერპული, 34-ე წუთზე კი კოდი გაკპომ გაზარდა სხვაობა ორამდე.

მეორე ტაიმში თავისი გოლი მოჰამედ სალაჰმაც (63-ე წუთი) გაიტანა, რომელიც ამ სეზონში მისთვის 28-ე არის. 69-ე წუთზე კი დესტინი უდოჯიმ გაიტანა თავის კარში გოლი და მატჩის საბოლოო ანგარიშიც დაფიქსირდა.

ლივერპულმა ამ გამარჯვებით 82 ქულა დააგროვა და სეზონის დასრულებამდე 4 ტურით ადრე ჩემპიონობა გაინაღდა. არნე სლოტისთვის სადებიუტო სეზონი პრემიერ ლიგაში წარმატებით სრულდება.

მერსისაიდული გუნდი ინგლისის ჩემპიონი ისტორიაში მეოცედ გახდა და ამ მაჩვენებლით მანჩესტერ იუნაიტედს დაეწია.