უნგრეთის ფეხბურთის ფედერაციამ ეროვნული გუნდის კაპიტნისა და მთავარი ვარსკვლავის, დომინიკ სობოსლაის ჯანმრთელობის მდგომარეობაზე ოფიციალური განცხადება გაავრცელა.
გუშინდელი სამედიცინო გამოკვლევების შედეგად დადასტურდა, რომ ლივერპულის შემტევს მუხლის ტრავმა აწუხებს, რის გამოც მისი თბილისში, საქართველოს ნაკრების წინააღმდეგ თამაში კითხვის ნიშნის ქვეშ დადგა. ცნობისთვის, სობოსლაიმ ეს დაზიანება ინგლისში, კრისტალ პალასთან დაპირისპირებისას მიიღო, რის გამოც მატჩის 69-ე წუთზე ის შეცვალეს.
უნგრელთა სამედიცინო შტაბის ინფორმაციით, კაპიტანს ყველა საჭირო გამოკვლევა უკვე ჩაუტარდა და ექიმები მაქსიმუმს აკეთებენ მის სწრაფად გამოსაჯანმრთელებლად. თუმცა, გავრცელებული ცნობით, შეძლებს თუ არა სობოსლაი მოედანზე გასვლას, ეს უშუალოდ მატჩის დაწყების წინ გადაწყდება.
ადგილობრივი მედიის მტკიცებით, თუ ლივერპულის ფეხბურთელი თბილისურ მატჩში მონაწილეობას ვერ მიიღებს, სასტარტო თერთმეტეულში მას იოზეფ ურბლიკი ჩაანაცვლებს. 30 წლის მოთამაშეს აქამდე მხოლოდ სლოვაკეთის ასაკობრივ გუნდებში უთამაშია, ახლა კი უნგრეთის ეროვნული ნაკრებისგან მიწვევა მიიღო და არ არის გამორიცხული, მისი საერთაშორისო დებიუტი სწორედ რამაზ სვანაძის გუნდის წინააღმდეგ შედგეს.
შეგახსენებთ, რომ საქართველო-უნგრეთის დაპირისპირება 14 ნოემბერს, 21:00 საათზე გაიმართება.
