იუვეს განადგურებიდან ხვიჩას წასვლამდე - რა მოხდა ნაპოლიში ზუსტად 2 წელიწადში?

2023 წლის 13 იანვარს დიეგო არმანდო მარადონას სახელობის სტადიონზე ნაპოლიმ იუვენტუსი მიიღო.

ეს საღამო ნაპოლის ისტორიაში ოქროს ასოებით შევიდა. პარტენოპეიმ ბიანკონერი 5-1 გაანადგურა. მასპინძელთა მხრიდან გოლები ვიქტორ ოსიმენმა (2), ხვიჩა კვარაცხელიამ, ამირ რაჰმანიმ და ელიფ ელმასმა გაიტანეს.

გოლთან ერთად ქართველმა შემტევმა 2 საგოლე გადაცემაც მიითვალა და ვიქტორ ოსიმენის პირველ გოლშიც დიდი როლი ითამაშა.

ნაპოლიმ ამ გამარჯვების შემდეგ იტალიის სერია ა-ს სატურნირო ცხრილში ლიდერობა გაიმყარა, მეორეადგილოსან იუვენტუსთან 10-ქულიანი უპირატესობა მოიპოვა, გულშემატკივრებმა კი იმის დაჯერება დაიწყეს, რომ დიდხნიანი პაუზის შემდეგ სკუდეტო მათი იქნებოდა.

ნეაპოლიტანელებმა საქმე ბოლომდე მიიყვანეს და 4 მაისს უდინეზესთან ფრედ ნათამაშები მატჩის შემდეგ ჩემპიონობა ოფიციალურად გაინაღდეს. 33-წლიანი ლოდინის შემდეგ ნაპოლიმ მე-3 სკუდეტო მოიგო.

ჩემპიონობის მთავარი მოქმედი გმირები ხვიჩა კვარაცხელია და ვიქტორ ოსიმენი აღმოჩდნენ. ბათუმის დინამოდან გადასულმა, ადგილობრივებისთვის სრულად უცნობმა ქართველმა ბიჭმა პირველივე სეზონში 12 გოლი და 10 საგოლე გადაცემა დააგროვა და სეზონის საუკეთესო მოთამაშედ დასახელდა. სერია ა-ს ბომბარდირი და საუკეთესო თავდამსხმელი კი ოსიმენი გახდა, რომელმაც 26 გოლის გატანა შეძლო.

დიეგო არმანდო მარადონას შემდეგ ქალაქს ასეთი გმირები არ ჰყოლია. იყვნენ კარგი მოთამაშეები, თუმცა პარტენოპეისთვის ჩემპიონობა ვერავის მოეტანა.

პრობლემების დასაწყისი

პრობლემები კი სწორედ ჩემპიონობის შემდეგ დაიწყო. ტრიუმფის შემოქმედმა, მთავარმა მწვრთნელმა ლუჩიანო სპალეტიმ მაჟორულ ნოტზე გადაწყვიტა გუნდი დაეტოვებინა, აურელიო დე ლაურენტისისთვის კი მისი ჩანაცვლება დიდი თავის ტკივილი აღმოჩნდა.

სპალეტისთან ერთად გუნდი სერია ა-ს სეზონის საუკეთესო მცველმა, კიმ მინ-ჯემაც დატოვა, რის შემდეგაც ნაპოლიმ სათანადო შევსება ასევე ვერ მიიღო.

2023-24 წლების სეზონში ჩემპიონ გუნდს 3 მწვრთნელი ჰყავდა - სპალეტი რუდი გარსიამ შეცვალა, თუმცა ფრანგმა მხოლოდ ნოემბრამდე იმუშავა, მისი ადგილი ვალტერ მაძარიმ დაიკავა, რომელიც ერთ დროს ნაპოლიში ეფექტურად მუშაობდა, თუმცა ამჯერად მისი თავკაცობა წარუმატებელი აღმოჩნდა, სეზონი კი ფრანჩესკო კალცონამ დაასრულა.

მიუხედავად იმისა, რომ გუნდმა ევროტურნირებზე გასვლაც კი ვერ მოახერხა, ხვიჩა კვარაცხელიამ სერია ა-ს 23-24 წლების სეზონში 11 გოლი და 6 საგოლე გადაცემა მიითვალა, ოსიმენმა კი 15 გოლი გაიტანა.

ოსიმენის საგა

2024 წლის ივნისში აურელიო დე ლაურენტისმა მთავარი მწვრთნელის პოსტზე ანტონიო კონტე დანიშნა. აქედან დაიწყო კიდევ ერთი პრობლემა, რასაც ვიქტორ ოსიმენის საგა ჰქვია.

იტალიელმა სპეციალისტმა თავიდანვე მკაცრი პოზიცია დაიჭირა და განაცხადა, რომ ნიგერიელი თავდამსხმელი მის გეგმებში აღარ შედიოდა და დარჩენის შემთხვევაში ის ვერ ითამაშებდა.

თავის მხრივ ოსიმენით დაინტერესებული პსჟ და ჩელსი იყვნენ. პარიზელებმა ნაპოლისთან სატრანსფერო თანხაზე შეთანხმებას ვერ მიაღწიეს, ლონდონელების შემთხვევაშიც გარიგება არ შედგა და ფეხბურთელი კიდევ უფრო რთულ სიტუაციაში აღმოჩნდა.

იყო საუდის არაბეთის ვარიანტიც, თუმცა ალ აჰლიმ საბოლოოდ უფრო იაფ ვერსიაზე, აივან ტოუნიზე შეაჩერა არჩევანი და ოსიმენი სატრანსფერო ფანჯრის ბოლო დღეს კვლავ უტრანსფეროდ დარჩა.

ნიგერიელს ხსნად თურქეთი მოევლინა, სადაც სატრანსფერო ფანჯარა რამდენიმე დღით გვიან იხურება და საბოლოოდ ოსიმენი გალათასარაიში იჯარის წესით აღმოჩნდა.

ხვიჩას კონტრაქტი და ნეაპოლური ამბის დასასრული

ანტონიო კონტე ხვიჩა კვარაცხელიას თავისი გუნდის მნიშვნელოვან ნაწილად მიიჩნევდა და ზაფხულში მის გაყიდვას ეწინააღმდეგებოდა, სეზონის მიმდინარეობის პარალელურად კი იტალიურ პრესაში არ წყდებოდა ნაპოლისა და ქართველი ფეხბურთელის შესახებ გავრცელებული ამბები ახალი კონტრაქტის თაობაზე.

მხარეების წამოყენებული პირობები ერთმანეთს არ ემთხვეოდა, საბოლოოდ კი საკითხი ჩიხში შევიდა და კომპრომისი არ შედგა, ეს ყველაფერი კი გასულ დღეებში ხვიჩას გარშემო სატრანსფერო ციებ-ცხელებით დასრულდა.

საბოლოოდ კი 13 იანვარს ცნობილი გახდა, რომ პსჟ-მ და ნაპოლიმ სიტყვიერ შეთანხმებას მიაღწიეს და ხვიჩა კვარაცხელია მალე ოფიციალურად გახდება პარი სენ-ჟერმენის ფეხბურთელი.

ასე სრულდება კვარადონას ისტორია ნაპოლიში. საჩემპიონო სეზონიდან კი პარტენოპეის გულშემატკივრებს მხოლოდ მოგონებები რჩებათ. წავიდა სპალეტი, კიმი, ოსიმენი და ახლა უკვე გუნდს კვარაცხელიაც ტოვებს.

ერთი კი ცხადია, ნეაპოლის ქუჩები არასდროს დაივიწყებენ 33-წლიანი ლოდინის შემდეგ მოპოვებულ სკუდეტოს.