"პასიური იყო, ორთაბრძოლებში დამარცხდა" - ფრანგული მედია კვარას აკრიტიკებს

პარი სენ-ჟერმენმა საფრანგეთის ლიგა 1-ის მეხუთე ტურში მარსელი სტუმრად 2:1 დაამარცხა, თუმცა ხვიჩა კვარაცხელიას თამაშმა ფრანგული მედიის მხრიდან კრიტიკა და დაბალი შეფასებები დაიმსახურა.

საქართველოს ნაკრების ვარსკვლავმა მოედანზე 59 წუთი დაჰყო, შემდეგ კი ლუის ენრიკემ იგი ფერან ტორესით შეცვალა.

Foot Mercato (4.5 ქულა) წერს:

დღევანდელმა მატჩმა იმედგაცრუება გამოიწვია. სეზონის ნელი სტარტის შემდეგ, ხვიჩა კვარაცხელია ჩვეულ პოზიციაზე, მარცხენა ფლანგზე გამოვიდა. ქართველ ფეხბურთელს თამაშზე გავლენის ქონა კვლავ გაუჭირდა. მას მეტოქისთვის დიდი საფრთხე არ შეუქმნია და ორთაბრძოლებში უმეტესწილად დამარცხდა. ეს იყო კიდევ ერთი მეტისმეტად პასიური პირველი ტაიმი იმ ფეხბურთელისგან, რომლისგანაც გაცილებით მეტს ელიან.

Maxi Foot (5.5 ქულა):

ქართველი ფეხბურთელი მატჩის პირველ საათში ერთ-ერთი ყველაზე აქტიური იყო. მარცხენა ფლანგზე რამდენჯერმე საინტერესოდ იმოქმედა და მუდმივად ცდილობდა ინდივიდუალური თამაშით გამკლავებას. აღსანიშნავია მომენტი, როდესაც დემბელეს პასის შემდეგ მან ქუსლით დაარტყა, თუმცა ბურთი ძელს სულ მცირედით აცდა.

Paris Fans (3 ქულა):

რამდენიმე კარგი გადაცემა ჰქონდა, მათ შორის ნუნუ მენდეშის მიმართულებით, თუმცა მისი კლასის ფეხბურთელისგან ეს ძალიან ცოტაა.

Goal (5 ქულა):

რთული საღამო გამოდგა ქართველი ფეხბურთელისთვის, რომელსაც მეტოქის საჯარიმოს მისადგომებთან თავისუფალი სივრცის მოძებნა უჭირდა. ის მატჩის დაწყებიდან ერთი საათის გასვლამდე შეცვალეს. ეს იყო ტაქტიკური გადაწყვეტილება, რომელმაც საბოლოოდ სტუმრებს სასურველი შედეგი მოიტანა.

მიმდინარე სეზონში ხვიჩას ლიგა 1-ის 5 მატჩში 1 საგოლე პასი აქვს. პსჟ 8 ქულით მე-6 ადგილზეა და მომდევნო შეხვედრას სანაკრებო პაუზის შემდეგ, 10 ოქტომბერს, პარკ დე პრენსზე გამართავს.