ხვიჩა შეცვალა და მატჩის ბედი გადაწყვიტა - ესპანელის ბენეფისი მარსელთან

პარი სენ-ჟერმენმა საფრანგეთის ჩემპიონატის მთავარ დაპირისპირებაში, კლასიკოში მარსელი სტუმრად 2:1 დაამარცხა.

მატჩის ერთ-ერთი მთავარი გმირი ლუის ენრიკეს გუნდის ესპანელი ახალწვეული, ფერან ტორესი გახდა, რომელმაც 59-ე წუთზე ხვიჩა კვარაცხელია შეცვალა და სულ რაღაც შვიდ წუთში ანგარიში გახსნა.

ტორესმა ბარსელონადან პარიზულ კლუბში გადასვლის შემდეგ საოცარი შედეგი დააფიქსირა. მან პარი სენ-ჟერმენის მაისურით ოფიციალურ მატჩებში შესრულებული პირველი 7 ზუსტი დარტყმიდან 7 გოლი გაიტანა. Foot Mercato-ს ცნობით, კლუბის ისტორიაში ამაზე უკეთესი სტარტი მხოლოდ ლეგენდარულ ზლატან იბრაჰიმოვიჩს ჰქონდა, რომელმაც თავის დროზე პირველ 6 მატჩში 8 გოლი შეაგდო.

ესპანელი შემტევის ფენომენალური ფორმა ლუის ენრიკეს სასიამოვნო, თუმცა სერიოზულ თავსატეხს უჩენს. მიუხედავად იმისა, რომ მწვრთნელს შეტევაში უსმან დემბელეს, ხვიჩა კვარაცხელიას, ბრედლი ბარკოლასა და დეზირე დუეს სახით უდიდესი კონკურენცია აქვს, ტორესის ეფექტურობა მას ძირითად შემადგენლობაში ადგილის მთავარ პრეტენდენტად აქცევს. ესპანელი ფეხბურთელი აცხადებს, რომ მცირე სათამაშო დროის მიუხედავად, თითოეული შანსის მაქსიმალურად გამოყენებას ცდილობს, რასაც მისი სტატისტიკაც იდეალურად ადასტურებს.