ივან ელგერა რეალს აკრიტიკებს: „ბარსელონასგან ბევრი რამ გვაქვს სასწავლი“

ალვარო არბელოა რეალის მთავარ მწვრთნელად მხოლოდ იანვარში დაინიშნა, თუმცა მისი მომავალი ბერნაბეუზე უკვე ბურუსითაა მოცული.

სულ უფრო ხშირად საუბრობენ იმაზე, რომ კლუბი მას კონტრაქტს არ გაუხანგრძლივებს და ზაფხულში ახალ მწვრთნელს მოიყვანს.

არბელოამ პოსტზე ჩაბი ალონსო შეცვალა, რომელმაც მადრიდი სუპერთასის ფინალში ბარსელონასთან მარცხის შემდეგ დატოვა. მართალია, ახალი ერა კარგად დაიწყო, თუმცა ბოლო კვირებში გუნდმა ქულები დაკარგა და ახლა ლა ლიგაში კატალონიელებს 4 ქულით ჩამორჩება.

რეალის ყოფილი მცველი, ივან ელგერა, მიიჩნევს, რომ არბელოას დანიშვნა შეცდომა იყო:

ალონსოს გაშვებას აზრი არ ჰქონდა, მაგრამ თუ მაინც უშვებდი, მის ნაცვლად გამოცდილი სპეციალისტი უნდა მოგეყვანა. რეალმა ასეთ კრიზისულ მომენტში სათადარიგო სკამზე იმპროვიზაცია არ უნდა დაიწყოს და გუნდი გამოუცდელ მწვრთნელს არ უნდა ჩააბაროს.

ელგერამ რეალის აკადემიის მუშაობაც გააკრიტიკა და ამ კომპონენტში ბარსელონა სამაგალითოდ მოიყვანა:

ბარსას ბრწყინვალე აკადემია აქვს და ეს მათ საქმეს უადვილებს. რეალს ამ მხრივ ბევრი აქვს სასწავლი. ბარსელონაში მწვრთნელები გუნდის სტილს ერგებიან, ჩვენთან კი ყოველი ახალი მწვრთნელი ყველაფერს თავიდან იწყებს. აღფრთოვანებული ვარ, როგორ უვლიან კატალონიაში ახალგაზრდებს.