ჯიკიჩი: "ოქროსთვის არ ვიბრძვით და ბრძოლებს თავად ვირჩევთ"

საქართველოს საკალათბურთო ნაკრების სერბმა მწვრთნელმა, ალექსანდრ ჯიკიჩმა იტალიასთან მარცხი შეაფასა.

ევრობასკეტის ჯგუფური ეტაპის მეორე ტურში საქართველო იტალიასთან 62:78 დამარცხდა.

კარგი იქნებოდა, უკეთესი მსაჯობა ყოფილიყო 

„ორი სრულიად განსხვავებული ნახევარი ვითამაშეთ. პირველ ტაიმში კარგი ბალანსი გვქონდა, იტალიის შეტევებს კარგად ვპასუხობდით, მაგრამ რაღაცებში არ გაგვიმართლა.

გაკვირვებული ვარ იმით, თუ როგორ ექცევიან ჩვენი გუნდის მოთამაშეებს - თუნდაც კაპიტან თორნიკე შენგელიას, თუმცა ეს ახლა სალაპარაკო არაა. კარგი იქნებოდა, უკეთესი მსაჯობა ყოფილიყო.

ვიცით, რა გვინდა და რა უნდა გავაკეთოთ. პირველი ორი თამაშიდან ერთი მოვიგეთ და წინ მივდივართ. 

გოგას კარგი თამაში არ მიკვირს

„როგორც იცით, გოგას მწვრთნელი ჯერ კიდევ იქამდე ვიყავი, სანამ NBA-ს მოთამაშე გახდებოდა. შესაბამისად, ბავშვობიდან ვაკვირდები და ვიცი მისი ძლიერი მხარეები და ისიც ვიცი, მოსამატებელი რაში აქვს.

ბითაძე ძალიან გვეხმარება, კარგად ესმის თავისი როლი, უფროსებს გვერდში უდგას და ახალგაზრდებს ეხმარება. არ მიკვირს, რომ ასე კარგად თამაშობს."

ჩემპიონობისთვის არ ვიბძვით, ჩვენ ბრძოლებს თავად ვირჩევთ

„ხვალ საბერძნეთს ვეთამაშებით. ზედიზედ ორი დღე გვიწევს თამაში, მაგრამ პრობლემა არაა, აქ ამისთვის ვართ. ჩემპიონობისთვის არ ვიბრძვით, მაგრამ ვიცით, რაც უნდა გავაკეთოთ. ჩვენ ბრძოლებს თვითონ ვირჩევთ. ზოგი მოთამაშე მეტს ითამაშებს, ვცდილობთ გუნდი ტრავმებისგან მაქსიმალურად დავიცვათ. ამ ეტაპზე დაზიანებული არავინაა."