ვალტერი ბოტასი ამ სეზონში ფორმულა 1-ში კადილაკთან ერთად დაბრუნდა, მას შემდეგ რაც 2025 წელი მერსედესის სარეზერვო მძღოლად გაატარა.
სერხიო პერესთან ერთად, კადილაკმა მისი გამოცდილების იმედი დაიდო ახალი ამერიკული F1 გუნდისთვის ძლიერი საფუძვლის შესაქმნელად, თუმცა 36 წლის ფინელმა მრბოლელმა გუნდს ის შედეგები ვერ მოუტანა, რასაც ელოდნენ.
ბოტასს ჯერაც არ მოუპოვებია არცერთი ქულა. მასთან ერთად ქულების გარეშე რჩებიან მისი თანაგუნდელი პერესი, ლენს სტროლი, ფერნანდო ალონსო და ნიკო ჰულკენბერგი.
თუმცა კადილაკი განსაკუთრებით უკმაყოფილოა ბოტასით, რომელმაც პირველ 5 რბოლაში საუკეთესო შემთხვევაში მხოლოდ მე-13 ადგილი დაიკავა (ასევე დაასრულა მე-16, მე-18 და მე-19 პოზიციებზე) და საკვალიფიკაციო სესიებში ხშირად პერესზე რამდენიმე მეათედი წამით ნელიც კი იყო.
Sky Italia-სა და BILD-ის ინფორმაციით, გუნდი სეზონის ადრეულ ეტაპზევე მისი დაქვეითების შესაძლებლობასაც განიხილავს.
მომავალ კვირას გასამართი მონაკოს გრან-პრი (5-7 ივნისი) გადამწყვეტი იქნება. თუ ბოტასი საკუთარ შედეგებს ვერ გააუმჯობესებს, შესაძლოა ის გუნდიდან დროებით ჩამოაშორონ და მის ნაცვლად კოლტონ ჰერტა, რომელიც ამჟამად სარეზერვო მრბოლელად მუშაობს და რომელსაც მომავალში ერთ-ერთი ძირითადი ადგილი თითქმის გარანტირებულად მიიჩნევა, უფრო ადრე დააწინაურონ.
