საერთაშორისო ტესტირების სააგენტო (ITA) იუწყება, რომ სპორტულმა საარბიტრაჟო სასამართლომ (CAS) სერბი მოჭიდავის, ზურაბი დათუნაშვილის მიერ შეტანილი აპელაცია CAS-ის ანტი-დოპინგური განყოფილების (CAS ADD) 2024 წლის 19 სექტემბერს გამოტანილი გადაწყვეტილების წინააღმდეგ უარყო.
როგორც ITA-მ ადრე განაცხადა, სერბი მოჭიდავე ზურაბი დათუნაშვილი ITA-ს ბრალდებული ჰყავდა რამდენიმე ანტი-დოპინგური წესის დარღვევაში (ADRV): შარდის ჩანაცვლებაში 2021 წლის 27 მაისს, ტოკიო 2020-ის ოლიმპიური თამაშებისთვის მზადების პერიოდში და ასევე გაყალბებული ვიდეოს წარმოებასა და მტკიცებულების სახით გამოყენებაში, 2022 წლის 6 იანვარს გამოტოვებული დოპინგ-ტესტის გასამართლებლად.
2024 წლის 19 სექტემბერს CAS ADD-მა ზურაბი დათუნაშვილი 5-წლიანი დისკვალიფიკაციით დასაჯა. სპორტსმენის მიერ 2021 წლის 27 მაისიდან 2023 წლის 11 აპრილამდე (დროებითი დისკვალიფიკაციის თარიღამდე) მიღწეული ყველა შედეგი გაუქმდა.
2025 წლის 17 ნოემბერს, სპორტსმენის მიერ CAS ADD-ის გადაწყვეტილების ნაწილობრივად გასაჩივრების შემდეგ, CAS-მა უარყო მისი აპელაცია, რითაც დაადასტურა, რომ ბატონმა დათუნაშვილმა მართლაც დაარღვია ანტი-დოპინგური წესები - აკრძალული მეთოდის გამოყენება (შარდის ჩანაცვლება) და ჩარევა (გაყალბებული მტკიცებულების გამოყენება), UWW-ის ანტი-დოპინგური წესების 2.2 და 2.5 მუხლების შესაბამისად და 5-წლიანი დისკვალიფიკაცია მიიღო, რომელიც ძალაში 2028 წლის 10 აპრილამდე დარჩება.
CAS-მა ასევე დაადასტურა სპორტსმენის მიერ 2021 წლის 27 მაისის შემდეგ მიღწეული ყველა შედეგის გაუქმება, რაც მოიცავს მის ბრინჯაოს მედალს ტოკიო 2020-ის ოლიმპიურ თამაშებზე და ოქროს მედლებს 2021 და 2022 წლების UWW-ის მსოფლიო ჩემპიონატებზე.
ITA დამატებით კომენტარს ამ საკითხზე აღარ გააკეთებს. - წერია განცხადებაში.
