კიდევ ერთი ლეგენდა წავიდა - სტენ ვავრინკა ჩოგბურთს დაემშვიდობა

მსოფლიოს ყოფილმა მესამე ჩოგანმა, სტენ ვავრინკამ, პროფესიული კარიერა დაასრულა.

41 წლის შვეიცარიელმა ბოლო შეხვედრა ბაზელის ტურნირის პირველ წრეში ჩაატარა და ირჟი ლეჰეჩკასთან 5:7, 6:7 (2) დამარცხდა.

ვავრინკამ კარიერის განმავლობაში დიდი სლემის სამი ტურნირი მოიგო - 2014 წელს ავსტრალიის ღია პირველობა, 2015 წელს როლან გაროსი, ხოლო 2016 წელს აშშ-ის ღია პირველობა.

სამივე ფინალში მან მსოფლიოს მოქმედი პირველი ჩოგანი დაამარცხა: ავსტრალიაში რაფაელ ნადალს აჯობა, საფრანგეთსა და აშშ-ში კი - ნოვაკ ჯოკოვიჩს. შვეიცარიელმა როლან გაროსის ფინალში 2017 წელსაც ითამაშა, თუმცა ნადალთან წააგო.

ვავრინკას ანგარიშზე ATP-ის დონის 16 ერთეულთა და სამი წყვილთა ტიტულია. 2008 წლის ოლიმპიადაზე მან როჯერ ფედერერთან ერთად წყვილებში ოქროს მედალი მოიპოვა, 2014 წელს კი შვეიცარიის ნაკრებთან ერთად დევისის თასს დაეუფლა.