კიმი ანტონელიმ ზედიზედ მე-3 რბოლა მოიგო

კიმი ანტონელიმ დრამატულ მაიამის გრან პრიზე გამარჯვება მოიპოვა, სადაც იტალიელმა ლანდო ნორისის ზეწოლას გაუძლო და სეზონში ზედიზედ მე-3 რბოლა მოიგო.

სტარტზე დრამატული მოვლენები განვითარდა: პოულის პოზიციაზე მყოფმა ანტონელიმ მაქს ვერსტაპენთან და შარლ ლეკლერთან ერთად სამმხრივი ბრძოლა გამართა, თუმცა პირველ მოსახვევში როგორც მერსედესის, ისე რედ ბულის ბოლიდებმა ბლოკირება განიცადეს. მალევე ვერსტაპენი დატრიალდა და პოზიციები დაკარგა.

შემდგომში ლიდერობა არაერთხელ შეიცვალა - ანტონელიმ მოგვიანებით ლეკლერს გაასწრო, ხოლო ნორისი, ოსკარ პიასტრი და ვერსტაპენიც გარკვეული დროით ლიდერობდნენ. ისაკ ჰაჯარისა და პიერ გასლის ავარიების გამო რბოლის დასაწყისში უსაფრთხოების მანქანა გამოვიდა.

ბოლოს რბოლა ანტონელისა და ნორისის ორთაბრძოლად გადაიქცა, სადაც მაკლარენი ბოლომდე ეწეოდა მერსედესს. მიუხედავად ზეწოლისა, ანტონელიმ ლიდერობა შეინარჩუნა და სეზონში მე-3 გამარჯვება მოიპოვა, ამასთან ისტორიაში პირველი გახდა, ვინც თავისი პირველი 3 პოულის პოზიცია გამარჯვებებად გადააქცია.

ნორისმა ფინიშზე 3.264 წამით ჩამორჩენით მე-2 ადგილი დაიკავა, ხოლო პიასტრიმ ბოლო ორ ქაოტურ წრეში ლეკლერს გადაასწრო და პოდიუმის ბოლო საფეხურზე მოხვდა.

ლეკლერი მოგვიანებით დატრიალდა, თუმცა ტრასაზე დარჩენა შეძლო, მაგრამ მას მერსედესის ჯორჯ რასელმა გაუსწრო და მე-4 ადგილი დაიკავა. ვერსტაპენმა ფინიშზე ლეკლერს გაასწრო და მე-5 ადგილზე გავიდა.

ლუის ჰამილტონმა უფრო მშვიდ რბოლაში მე-7 ადგილი დაიკავა, ხოლო ფრანკო კოლაპინტომ ალპინისთვის მნიშვნელოვანი ქულები მოიპოვა და მე-8 იყო. კარგი შედეგი აჩვენა უილიამსმაც - კარლოს საინსი და ალექს ალბონი საუკეთესო ათეულში, მე-9 და მე-10 ადგილებზე გავიდნენ.

მრბოლელთა საჩემპიონო ბრძოლაში ასეთი სიტუაციაა:

1. კიმი ანტონელი (მერსედესი) - 100 ქულა

2. ჯორჯ რასელი (მერსედესი) - 80 ქულა

3. შარლ ლეკლერი (ფერარი) - 63 ქულა

4. ლანდო ნორისი (მაკლარენი) - 51 ქულა

5. ლუის ჰამილტონი (ფერარი) - 49 ქულა

6. ოსკარ პიასტრი (მაკლარენი) - 43 ქულა

7. მაქს ვერსტაპენი (რედ ბული) - 26 ქულა

8. ოლი ბერმანი (ჰაასი) - 17 ქულა

9. პიერ გასლი (ალპინი) - 16 ქულა

10. ლიამ ლოუსონი (რეისინგ ბულსი) - 10 ქულა