კიოლნის დაცვის ლიდერი - ლოჩოშვილის მორიგი გამორჩეული თამაში ბუნდესლიგაში

გერმანიის ბუნდესლიგის მე-7 ტურში კიოლნი და შალკე უგოლოდ დაზავდნენ, რაც მასპინძელი თხებისთვის მიმდინარე სეზონში კარის მშრალად შენახვის პირველი შემთხვევა აღმოჩნდა.

ამ წარმატებაში უდიდესი წვლილი ქართველ მცველს, ლუკა ლოჩოშვილს მიუძღვის, რომელმაც შეხვედრა სასტარტო თერთმეტეულში დაიწყო და მოედანი მხოლოდ 90-ე წუთზე, კუნთის დაჭიმულობის გამო დატოვა.

ქართველის დამაჯერებელი თამაში ანალიტიკურმა პლატფორმებმა უმაღლეს დონეზე შეაფასეს. Sofascore-ის ვერსიით, ლუკამ კიოლნის რიგებში ყველაზე მაღალი ქულა - 8.0 დაიმსახურა, Whoscored-მა მასპინძელთა შორის საუკეთესოდ (7.81) დაასახელა, ხოლო Flashscore-მა 8.3 ქულით პირდაპირ მატჩის საუკეთესო მოთამაშედ აღიარა.

მიმდინარე სეზონში ეს ლოჩოშვილისთვის მე-8 საკლუბო მატჩი იყო, სადაც პირველი ყვითელი ბარათი მიიღო. 28 წლის მცველის სტატისტიკა მართლაც გამორჩეულია. ლოჩოშვილმა 7-დან 6 მიწაზე, ხოლო 9-დან 7 საჰაერო ორთაბრძოლა მოიგო. მან 7-ჯერ შეძლო ვითარების განმუხტვა, 5-ჯერ დაიბრუნა ბურთი და მეტოქის გადაცემაც ჩაჭრა. აღსანიშნავია მისი ზუსტი პასების მაჩვენებელი, მეტოქის ნახევარზე 30-დან 28, ხოლო საკუთარ ნახევარზე 65-დან 61 გადაცემა ზუსტი აღმოჩნდა, ასევე 4 შორეული პასიდან 3 მიზანს მიაღწია.

ბუნდესლიგაში კიოლნი 8 ქულით მე-11 ადგილს იკავებს. მომდევნო ტურის შეხვედრას ქართველის გუნდი 1-ელ ნოემბერს, სტუმრად, მე-17 პოზიციაზე მყოფ ბერლინის უნიონთან გამართავს.