კლასიკური სამჭიდი - გიორგი გელაშვილი ევროპის ჩემპიონი გახდა

ლიეტუვის ქალაქ დრუსკინინკაიში მიმდინარე კლასიკური სამჭიდის ევროპის ახალგაზრდული ჩემპიონატზე, გიორგი გელაშვილმა ჩემპიონობა იზეიმა.

 -59 კგ. წონით კატეგორიაში, გიორგიმ ჩაჯდომაში 182.5 კილოგრამი დააფიქსირა და მეორე ადგილი მოიპოვა, წოლჭიმში - 147.5 კგ. და პირველი ადგილი დაიკავა, ხოლო ამოწევაში 202.5 კგ. ჩათვალა. შედეგად, სამჭიდის ჯამში, გიორგიმ 532.5 კგ. დააგროვა და ჩემპიონი გახდა.

მიმდინარე ევროპის ჩემპიონატზე ასევე მედლები მოიპოვეს:

გიორგი წიკლაურმა (-53 კგ.) - ჩაჯდომაში 100 კგ. დაძლია, წოლჭიმში - 85 კგ, ამოწევაში - 135 კგ, საბოლოოდ კი სამივე დისციპლინაში ვერცხლის მედალი დაისაკუთრა; ხოლო სამჭიდის ჯამში 320 კგ. დააგროვა და ევროპის ვიცე-ჩემპიონის წოდება მიიღო.

საბა გოგიჩაიშვილმა (-59 კგ.) წოლჭიმში 132.5 კგ. დააფიქსირა, ჩემპიონობა იზეიმა და ევროპის ჭაბუკების რეკორდი დაამყარა, ამოწევაში კი 200 კგ. ჩათვალა და ბრინჯაოს პრიზიორი გახდა, მან ასევე ბრინჯაოს მედალი მოიპოვა სამჭიდის ჯამში 477.5 კგ-ით.

გიორგი მაისურაძემ (66 კგ.) წოლჭიმში მესამე ადგილი დაიკავა, მან 140 კგ. დაძლია. მერაბ სამხარაძემ (+120 კგ.) კი წოლჭიმში 165 კგ. ასწია და ბრინჯაოს პრიზიორი გახდა.

კონტინენტის პირველობა 7 დეკემბერს დასრულდება. მასში მონაწილეობას კიდევ ორი ქართველი მიიღებს.