"კლუბის გადაწყვეტილებას პატივს ვცემ", - თომას მიულერის გამოსამშვიდობებელი წერილი ბაიერნის ფანებს

თომას მიულერმა ოფიციალურად დაადასტურა, რომ სეზონის ბოლოს ბაიერნს დატოვებს.

„მოგესალმებით, ბაიერნის გულშემატკივრებო. მას შემდეგ, რაც ბოლო დროს ჩემს პერსონაზე ბევრი ჭორი წაიკითხეთ, მინდა, რომ ამ წერილით მოგმართოთ და ყველაფერს ფარდა ავხადო.

ამდენი წლის შემდეგაც კი, განურჩევლად ნათამაშები წუთებისა, უდიდეს სიამოვნებას მანიჭებს მოედანზე ამ ფეხბურთელებთან ერთად გასვლა და ჩვენი ფერების დაცვა. ადვილად წარმომედგინა, რომ ამ როლში მომავალ სეზონშიც ვიქნებოდი.

თუმცა, კლუბმა მომავალი სეზონისთვის ჩემთან კონტრაქტის გახანგრძლივებაზე მოლაპარაკებების წარმოება არ ისურვა. მიუხედავად იმისა, რომ ეს ჩემს სურვილს არ ემთხვევა, მნიშვნელოვანია, რომ კლუბი თავის მოსაზრებაზე დარჩეს და ის ბოლომდე დაიცვას. პატივს ვცემ ამ ნაბიჯს, რომელიც, დარწმუნებული ვარ, რომ ხელმძღვანელობამ და მმართველმა ბორდმა გაჭირვებით მიიღო.

რა თქმა უნდა, ბოლო კვირების და თვების გაურკვევლობა ძალიან არ მომწონდა. თუმცა მგონია, რომ აქაც ის სიტუაციაა, რაც ჩემს თამაშში, რომელიც ასევე არ გამოირჩეოდა სრულყოფილებით, მაგრამ მიზანმიმართული იყო მომდევნო ნაბიჯზე და ოპტიმისტურ ხედვაზე. არაზუსტი პასის შემდეგ გუნდი უნდა გაერთიანდეს და ბურთი დაიბრუნოს. ბოლო თვეების განმავლობაში ჩატარებული არაერთი დისკუსიის შემდეგ, ამის გაკეთება მოვახერხეთ.

ყველას მადლიერი ვარ, ვინც ბაიერნში ჩემს ამდენწლიან ყოფნას ხელი შეუწყო და უდიდეს სიხარულს ვგრძნობ იმისთვის, რომ ამ დაუჯერებლად დატვირთული და ბედნიერი 25 წელი თქვენთან ერთად გავატარე. ეს ბრწყინვალე და გამოსარჩევი მომენტები ყოველთვის ჩემთან დარჩება, მე მუდმივად ვიქნები თქვენთან და ბაიერნთან დაკავშირებული.

ახლა ბოლომდე ვართ კონცენტრირებულები ამ სეზონში დასახული მიზნების შესრულებაზე. ჩემთვის ოცნების ასრულება იქნებოდა სახლში საჩემპიონო თასის დაბრუნება და მაისის ბოლოს ნანატრ ჩემპიონთა ლიგის ფინალში გასვლა. ამისათვის ყველაფერს გავიღებ.

მადლობა ყველაფრისთვის, რაც უკვე მოხდა და იმისთვისაც, რაც ახლა მოხდება. მხოლოდ წინ, ბაიერნი! თქვენი თომასი", - წერს 35 წლის ფეხბურთელი სოციალურ ქსელში.