კონორ მაკგრეგორი UFC 329-ზე მიღებული მუხლის ტრავმის შემდეგ უკვე აქტიურად მუშაობს ფეხის გამოსაჯანსაღებლად.
მაქს ჰოლოუეისთან რემატჩის დასაწყისში, ნახტომში დარტყმის მცდელობისას, ირლანდიელმა ჯვარედინი და გვერდითი იოგები დაიზიანა. ფეხზე მყარად დადგომის შეუძლებლობის გამო, მისი დაბრუნების ბრძოლა ხუთწლიანი პაუზის შემდეგ სულ რაღაც 69 წამში შეწყდა.
მაკგრეგორმა ინსტაგრამის 46.6 მილიონ გამომწერს ვიდეო გაუზიარა, სადაც ჩანს, თუ როგორ ვარჯიშობს სპეციალურ ტრენაჟორზე დაზიანებული ფეხის გასამაგრებლად. ვიდეოდან ირკვევა, რომ ირლანდიელს ოპერაცია ჯერ არ გაუკეთებია, რადგან ფეხზე ნაიარევი არ ეტყობა. გულშემატკივრებმა კომენტარებში მებრძოლს უდიდესი მხარდაჭერა გამოუცხადეს და სწრაფი გამოჯანმრთელება უსურვეს.
მოგვიანებით მაკგრეგორმა განმარტა, თუ რატომ ვერ შეძლო ბრძოლის გაგრძელება, განსხვავებით 2013 წლისგან, როდესაც ჰოლოუეისთან პირველ შეხვედრაში ასევე გაიწყვიტა ჯვარედინი იოგი. მისი თქმით, 13 წლის წინ ტრავმა მარცხენა, უკანა ფეხზე მიიღო და ბრძოლა პარტერში მიდიოდა, ახლა კი წინა, მარჯვენა ფეხი დაიზიანა, რამაც გადაადგილება და დარტყმების განხორციელება სრულიად შეუძლებელი გახადა. ირლანდიელმა ასევე დაამატა, რომ ბრძოლის შეჩერება მის ინიციატივას არ წარმოადგენდა.
