ევრო 2024-თან ერთად, ნახევარფინალური ეტაპი იწყება კოპა ამერიკაზეც, სადაც კოპას და მსოფლიოს მოქმედი ჩემპიონი არგენტინის ნაკრები ტურნირის დებიუტანტს, კანადის ნაკრებს დაუპირისპირდება.
არგენტინა - კანადა [04:00]
არგენტინის ნაკრები ტურნირს თავიდანვე მთავარი ფავორიტის სტატუსით ხვდებოდა და ამ დრომდე ამ სტატუსის გამართლებას ახერხებს, გუნდმა ჯგუფურ ეტაპზე 3-დან 3 გამარჯვება მოიპოვა და 1/4 ფინალში გასვლა საწყისი ორი მატჩის შემდეგ მოახერხა.
საინტერესოა, რომ არგენტინისთვის კოპა ამერიკა კანადასთან მატჩით დაიწყო - გუნდები ერთმანეთს ჯგუფის პირველ მატჩში დაუპირისპირდნენ და მოქმედმა ჩემპიონებმა დამაჯერებელი გამარჯვება (2:0) მოიპოვეს.
შემდეგ იყო გამარჯვება ჩილესთან (1:0), ჯგუფის ბოლო მატჩში კი არგენტინამ პერუს 2:0 სძლია და მეოთხედფინალში გოლგაუშვებლად გავიდა.
მეოთხედფინალურ დაპირისპირებაში არგენტინელთა მეტოქე ეკვადორი იყო, რომელსაც ალბისელესტე 1:0 უგებდნენ, თუმცა მატჩის მიწურულს გოლი გაუშვეს და გამარჯვებულის ბედის გამოვლინება პენალტების სერიას დასჭირდა, სადაც ისევ ემი მარტინესმა იყოჩაღა და ლეო მესის გაფუჭებული თერთმეტმეტრიანის მიუხედავად, თავისი ნაკრები 1/2 ფინალში გაიყვანა.
კანადამ კოპაზე თავისი პირველი მატჩის არგენტინასთან წაგების შემდეგ, მეორე შეხვედრაში 59-ე წუთიდან კაცნაკლულად მოთამაშე პერუს 74-ზე გატანილი გოლით მოუგო, ბოლო ტურში 27-ე წუთიდან კაცნაკლულ ჩილესთან უგოლო ფრე ითამაშა და ჯგუფიდან 4 ქულით, მე-2 ადგილიდან გავიდა.
1/4 ფინალში კანადელების მეტოქე ვენესუელა იყო. მატჩი არგენტინა - ეკვადორის მსგავსად 1:1 დასრულდა და გამომდინარე იქიდან, რომ ფინალის გარდა კოპაზე არცერთ სხვა ეტაპზე ექსტრა-ტაიმები არ არსებობს, გამარჯვებულის ბედი აქაც პენალტებში გამოვლინდა და კანადა თავის სადებიუტო ევროზე პირდაპირ 1/2 ფინალში გავიდა.
არგენტინისა და კანადას ურთიერთშეხვედრების ისტორია მხოლოდ ორ მატჩს ითვლის - პირველი 2010 წელს გაიმართა (ამხანაგური), როცა არგენტინამ მსოფლიოსთვის მზადების პროცესში 5:0 იმარჯვა, მეორე კი ახლახანს - 21 ივნისს, ამ მატჩის შესახებ უკვე ზემოთ მოგიყევით და ახლა მხოლოდ იმას გაგიმეორებთ, რომ ალბისელესტემ 2:0 მოიგო.
არგენტინელების კაპიტანი და მთავარი ვარსკვლავი ლეო მესი ჯერჯერობით შედარებით სუსტ ევროს ატარებს - მას გოლებში მონაწილეობა ამ დრომდე არ მიუღია, ეკვადორთან კი საერთოდ პენალტიც გააფუჭა. ამბობენ, ლეო გარკვეული დისკომფორტით თამაშობსო.
სავარაუდო შემადგენლობები
არგენტინა: მარტინესი, მოლინა, ლისანდრო, ტალიაფიკო, მაკალისტერი, დე პაული, დი მარია, მესი, ლაუტარო, ალვარესი
კანადა: კრეპო, ჯონსტონი, ბომბიტო, კორნელიუსი, დევისი, კონტე, ეუსტაკიო, ლარეია, დევიდი, შაფელბურგი, ლარინი.
