გერმანიის ფეხბურთის კავშირის ოფისებსა და ქვეყნის რამდენიმე ქალაქში პოლიციამ მასშტაბური რეიდები ჩაატარა.
გამოძიება ევრო 2024-ის ბილეთებთან დაკავშირებულ სავარაუდო კორუფციულ სქემებს ეხება. სამართალდამცავები იკვლევენ, ჰქონდა თუ არა ადგილი არაუფლებამოსილ სარგებელს, მათ შორის მატჩებზე ექსკლუზიურ დაშვებას, მოგზაურობასა და სასტუმროებში განთავსებას, რაც შესაძლოა ქრთამის აღების ნიშნებს შეიცავდეს.
საქმე უკავშირდება ტურნირის საორგანიზაციო ორგანოს - Euro 2024 GmbH-თან დაკავშირებულ ორ პირს.
ბერლინში სამთავრობო კოალიციის ლიდერები საკვანძო რეფორმებზე მსჯელობისთვის შეიკრიბნენ. კანცლერ ფრიდრიხ მერცის ხელმძღვანელობით გამართულ შეხვედრაზე დღის წესრიგში დგას საშემოსავლო გადასახადის რეფორმა, საპენსიო სისტემა, შრომის ბაზრის მოქნილობა და ბიუროკრატიის შემცირება.
კოალიცია მიზნად ისახავს გადასახადების შემსუბუქებას დაბალი და საშუალო შემოსავლის მქონე პირებისთვის, თუმცა მთავარ გამოწვევად კვლავ დაფინანსების წყაროების მოძიება რჩება.
მიუნხენის სასამართლო გერმანია-ავსტრიის საზღვარზე მიმდინარე პერსონალური შემოწმებების კანონიერებას განიხილავს. საქმე ერთ-ერთმა მგზავრმა აღძრა, რომელსაც მატარებელში დოკუმენტების წარდგენაზე უარის თქმის გამო ჩანთის ჩხრეკა ჩაუტარდა.
მოსარჩელე აცხადებს, რომ აღნიშნული ზომები არღვევს ევროკავშირის კანონმდებლობას და შენგენის შეთანხმებას, რომელიც შიდა სასაზღვრო კონტროლის გაუქმებას ითვალისწინებს.
