კვარა ბაიერნთან, მამარდა რეალთან - ქართველებს დიდი გამოცდა ელით

უეფას ჩემპიონთა ლიგის მე-4 ტურის პირველ სათამაშო დღეს საინტერესო მატჩები გველის.

ტური ორი ადრეული თამაშით გაიხსნება. ნაპოლი საკუთარ მოედანზე ფრანკფურტის აინტრახტს მიიღებს, პრაღის სლავია კი არსენალს უმასპინძლებს.

ნაპოლის და აინტრახტს სამი ტურის შემდეგ 3-3 ქულა აქვთ. გერმანელებმა პირველ ტურში გალათასარაი გაანადგურეს 5-1, ნაპოლიმ კი მეორე ტურში სპორტინგს მოუგო 2-1.

რაც შეეხება არსენალს, არტეტას გუნდი 3 ტურის შემდეგ უდანაკარგოა და 9 ქულით ლიგის ფაზის ერთ-ერთი ლიდერია, ლონდონელებმა ატლეტიკი, ოლიმპიაკოსი და ატლეტიკო დააამარცხეს, ჯამში 8 გოლი გაიტანეს და თავად გოლი არ გაუშვიათ. პრაღელებს კი 2 ქულა აქვთ.

პარალელურად გაიმართება ტურის და ალბათ მთლიანად ლიგის ფაზის ცენტრალური მატჩები. ლივერპული ენფილდზე მადრიდის რეალს მიიღებს, გიორგი მამარდაშვილს კი მორიგი დიდი გამოცდა ელის.

არსენალის მსგავსად რეალიც უდანაკარგოა და 3 ტურის შემდეგ 9 ქულა აქვს. ალონსოს გუნდმა მარსელი, კაირათი და იუვენტუსი დაამარცხა. ლივერპულს კი 6 ქულა აქვს, სლოტის შეგირდებმა პირველ ტურში ატლეტიკოს 3-2 მოუგეს, მესამე ტურში კი აინტრახტი გაანადგურეს 1-5.

გიორგი მამარდაშვილმა პრემიერ ლიგის გასულ ტურში ასტონ ვილასთან კარი მშრალად შეინახა (2-0), რაც რეალთან მატჩის წინ მნიშვნელოვანი იყო.

სავარაუდო შემადგენლობები (uefa.com)

ლივერპული - მამარდაშვილი; ბრედლი, კონატე, ვან დაიკი, რობერტსონი; გრავენბერხი, მაკ ალისტერი; სალაჰი, ვირცი, გაკპო; ეკიტიკე

რეალი - კურტუა; ალექსანდერ-არნოლდი, ედერ მილიტაო, ჰაუსენი, კარერასი; ვალვერდე, ჩუამენი; არდა გიულერი, ბელინგემი, ვინისიუს ჟუნიორი; მბაპე

პარიზში ლიგის ფაზის ორი ლიდერის, პარი სენ-ჟერმენისა და ბაიერნის დაპირისპირება შედგება.

ჩემპიონთა ლიგის მოქმედმა გამარჯვებულებმა საწყის ტურებში ატალანტა, ბარსელონა და ლევერკუზენი დაამარცხეს, ბაიერნმა კი ჩელსის, პაფოსსა და ბრიუგეს აჯობა.

ხვიჩა კვარაცხელიას ანგარიშზე ლიგის მიმდინარე სეზონში 2 გოლი და 1 საგოლე გადაცემაა, ქართველმა ლიგა 1-ის გასულ ტურშიც ბრწყინვალედ ითამაშა და ნიცასთან მატჩის საუკეთესო მოთამაშეც გახდა. გონსალუ რამოშმა ბოლო წუთზე სწორედ ქართველის თავური პასის შემდეგ გაიტანა გამარჯვების გოლი.

სავარაუდო შემადგენლობები (uefa.com)

პსჟ - შევალიე; ჰაკიმი, მარკინიოსი, პაჩო, ნუნუ მენდეში; ზაირ-ემერი, ვიტინია, ჟოაო ნევეში; კვარაცხელია, მაიულუ, ბარკოლა

ბაიერნი - ნოიერი; სტანიშიჩი; ტა, უპამეკანო, ლაიმერი; კიმიხი, პავლოვიჩი; ოლისე, გნაბრი, ლუის დიასი; კეინი

პარალელურად კიდევ ერთი ქართველის გუნდის თამაში გაიმართება, გიორგი ქოჩორაშვილის სპორტინგი ტურინს ესტუმრება და იუვენტუსს დაუპირისპირდება.

სპორტინგს 3 ტურში 6 ქულა აქვს. ლისაბონელებმა პირველ მატჩში კაირათი დაამარცხეს 4-1, სადაც ქართველმა ნახევარმცველმა საგოლე პასიც მიითვალა, გასულ ტურში კი მათ მარსელს აჯობეს 2-1.

თავის მხრივ იუვენტუსს მხოლოდ 2 ქულა აქვს. მეორე ტურში ტურინელებს გიორგი მიქაუტაძემაც გაუტანა გოლი, ვილიარეალთან მატჩი კი 2-2 დასრულდა.

21:45 

ნაპოლი - აინტრახტი

სლავია - არსენალი

00:00

ატლეტიკო - როიალ უნიონი

ბოდო/გლიმტი - მონაკო

იუვენტუსი - სპორტინგი

ლივერპული - რეალი

ოლიმპიაკოსი - პსვ

პსჟ - ბაიერნი

ტოტენჰემი - კოპენჰაგენი