როგორც მოსალოდნელი იყო, სატრანსფერო ფანჯრის დახურვის შემდეგ პარი სენ-ჟერმენის ხელმძღვანელობას საშუალება მიეცა, სტრატეგიის ახალ ეტაპზე, ფეხბურთელებთან კონტრაქტების გახანგრძლივებაზე, გადასულიყო.
ფრანგული L'Equipe-ის ცნობით, უსმან დემბელე ახალი კონტრაქტის გაფორმებასთან ძალიან ახლოსაა, რომელიც 2030 წლამდე იქნება ძალაში, ხვიჩა კვარაცხელია კი კლუბთან მოლაპარაკებების მოწინავე ეტაპზეა.
ამავდროულად, პსჟ-მ შეთავაზება დეზირე დუესაც გაუკეთა, ახალი ხელშეკრულება 2031 ან 2032 წლამდე იქნება გათვლილი.
21 წლის გარემარბს პსჟ-სთან მოქმედი კონტრაქტი 2029 წლის ივნისამდე აკავშირებს, თუმცა პარიზული კლუბის ხელმძღვანელობას საფრანგეთის ნაკრების ფეხბურთელის (15 მატჩი, 3 გოლი) მომავლის წინასწარ უზრუნველყოფა სურს.
პარიზში განმარტავენ, რომ ასეთი ადრეული შეთავაზების ერთ-ერთი მაგალითი ჟოაუ ნევეშია, რომელსაც ორგზის ევროპის ჩემპიონთან კონტრაქტი კლუბში გატარებული მხოლოდ ერთი სეზონის შემდეგ გაუხანგრძლივეს.
საფრანგეთის დედაქალაქში გატარებული ორი წლის განმავლობაში დეზირე დუემ მნიშვნელოვანი პროგრესი განიცადა. შესაბამისად, მისი ახალი კონტრაქტი ხელფასის „მნიშვნელოვან“ ზრდასაც ითვალისწინებს.
„გვინდა, მისი ანაზღაურება გუნდში მის მნიშვნელობას შეესაბამებოდეს“, - განმარტავენ კლუბის ხელმძღვანელობაში.
თავის მხრივ, დეზირე დუესაც სურს პსჟ-სთან გრძელვადიანი ხელშეკრულების გაფორმება. შესაძლოა, მხარეებმა შეთანხმებას საკმაოდ სწრაფად მიაღწიონ.
რაც შეეხება ხვიჩა კვარაცხელიას, გავრცელებული ინფორმაციით, ქართველი ფეხბურთელი პარიზულ კლუბთან კონტრაქტს 2031 წლამდე გაახანგრძლივებს.
