საქართველოს ნაკრების ნატურალიზებულმა კალათბურთელმა, მარკის რიდმა თურქეთის სუპერ ლიგაში მორიგი მაგარი მატჩი ჩაატარა. მისმა ტრაბზონსპორმა ბოლოსწინა ადგილზე მყოფ მერსინს 10-ქულიანი სხვაობით აჯობა - 90:80.
რიდმა 35:26 წუთი ითამაშა - 25 ქულა, 4 მოხსნა, 5 ასისტი. მისი მოედანზე ყოფნისას, ტრაბზონელებმა 8-ქულიანი უპირატესობა შეიქმნეს. ქულებით ყველაზე შედეგიანი იყო, ორივე გუნდში საუკეთესოდ დაასახელეს და MVP-ის სტატუსი მიიღო.
აღსანიშნავია, რომ რეგულარულის 30 ტურის შემდეგ, რიდი სამ კომპონენტშია საუკეთესო - საშუალოდ ყველაზე მაღალი ეფექტიანობის ინდექსი ჰქონდა (23.93) და საშუალოდ ყველაზე მეტ ქულას აგროვებდა (23.43). მისი გამძლეობაც გამოსარჩევია - სეზონში ყველაზე მეტი წუთი გაატარა მოედანზე (15 საათი, 33 წუთი და 48 წამი).
მარკისი ტრაბზონელთა ლიდერია და სანაკრებო პაუზის შემდეგ შესანიშნავ ფორმაშია, გამართულ 9 ტურში ასეთი სტატისტიკა აქვს: ქარშიაქასთან - 24 ქულა; მანისასთან - 34 ქულა; ბეშიქთაშთან - 17 ქულა; ბაშჯეშეჰირთან - 14 ქულა; ტოფასთან - 22 ქულა; პეტკიმ სპორთან - 30 ქულა; ფენერბაჰჩესთან - 31 ქულა; გალათასარაისთან - 17 ქულა; თურქ ტელეკომთან - 24 ქულა; მერსინთან - 25 ქულა.
სუპერ ლიგაში რეგულარული სეზონი დასრულდა - ტრაბზონსპორი მე-6 ადგილზე გავიდა და ასპარეზობას პლეი-ოფში გააგრძელებს. პირველ ეტაპზე მისი მეტოქე ბაჰჯეშეჰირ კოლეჯი იქნება, რომელიც რეგულარულში მე-3 პოზიციაზე გავიდა - გუნდები გამარჯვებულს 2 ან 3 მატჩში გაარკვევენ.
სამ კომპონენტში საუკეთესო - რიდმა რეგულარული გამორჩეულად ჩაატარა
