VIDEO: სეზონში მე-18 საგოლე მოქმედება - გულიაშვილის რასინგი ლა ლიგას უახლოვდება

გიორგი გულიაშვილმა ლა ლიგა 2-ში მორიგი საგოლე მოქმედება შეასრულა. მისი რასინგი ლა ლიგაში გადასვლას კიდევ ერთი ნაბიჯით მიუახლოვდა.

ჩემპიონატის 39-ე ტურში, სანტანდერელებმა სტუმრად მე-16 ადგილოსან ლეგანესს 2:1 მოუგეს. პირველი გოლისას, 26-ე წუთზე, გულიაშვილმა ბურთი საჯარიმოში მიიღო და დაუგორა ნაგეტ გეიეს, რომელმაც ცაციათი შედეგიანად დაარტყა.

ქართველმა შემტევმა ლა ლიგა 2-ის მიმდინარე სეზონის მე-16 მატჩში მე-8 საგოლე მოქმედება მიითვალა - 6 გოლი, 2 ასისტი. სეზონის პირველ ნახევარში, ბოსნიის ჩემპიონატის 18 ტურში 1 გოლი და 8 ასისტი ჰქონდა. ყველა ტურნირის ეგიდით, 2025-26 წლების საკლუბო სეზონში ჩატარებულ 37 თამაშში 8 გოლი და 10 ასისტი აქვს.

რასინგმა ძალიან მნიშვნელოვანი გამარჯვება მოიპოვა და ჩემპიონატის დასრულებამდე 3 ტურით ადრე ისევ 4-ქულიანი უპირატესობით ლიდერობს - დეპორტივო ლა კორუნიასა და ალმერიას 71-71 ქულა აქვთ. უმაღლესის პირდაპირ საგზურს საუკეთესო 2 გუნდი მიიღებს, მესამე პლეი-ოფით გამოვლინდება.

16 მაისს, გულიაშვილის გუნდი უმასპინძლებს ვალიადოლიდს, რომელიც ცხრილის შუაშია და არის შანსი, სატურნირო მოტივაცია აღარ ჰქონდეს.