ლა ლიგის მე-20 ტურში სოსიედადმა საკუთარ მოედანზე ბარსელონა დაამარცხა.
ლა რეალე არენაზე გამართული დაპირისპირება ბასკური გუნდის გამარჯვებით 2:1 დასრულდა.
ბარსელონა მატჩში დიდ უპირატესობას ფლობდა და არაერთი საგოლე მომენტიც ჰქონდა — მასპინძელთა კარი რამდენჯერმე ძელმა იხსნა, ასევე საოცარი სეივებით შეძლო თავის გამოჩენა მეკარე ალექს რემირომაც.
სამაგიეროდ, სოსიედადმა თავისი შანსები იდეალურად გამოიყენა და ორი გოლის გატანა მოახერხა. პირველი ტამის 32-ე წუთზე მიკელ ოიარსაბალმა შეძლო ანგარიშის გახსნა და თავის გუნდს პირველი ნახევარი მოაგებინა.
მეორე ნახევარში ბარსა უპირატესობას ზრდიდა და 70-ე წუთზე შეძლო ანგარიშის გათანაბრება — თავი ცვლილებაზე შემოსულმა მარკუს რაშფორდმა გამოიჩინა.
თუმცა, მაშინ როდესაც ყველა ბარსას მეორე გოლს ელოდა, მასპინძლებმა გაშვებიდან ერთ წუთშივე შეძლეს უპირატესობის აღდგენა — გონსალო გედეშმა საგოლე პასს გოლიც მიამატა და საბოლოო ანგარიში დააფიქსირა.
დარჩენილ დროში ბარსა გათანაბრებასთან ახლოს რამდენჯერმე იყო, თუმცა რემიროს კარის აღება ამ მატჩში მეტჯერ ვეღარ შეძლო.
ბარსელონას ყველა ტურნირზე ზედიზედ 11-მატჩიანი მოგებათა სერია შეუწყდა, გუნდს 49 ქულა დარჩა და რეალს უკვე არა ოთხით, როგორც ამ ტურის წინ იყო, არამედ ერთი ქულით უსწრებს.
სოსიედადმა კი ზედიზედ მეორე გამარჯვება მოიპოვა და ნელ-ნელა ევროტურნირების ზონასაც უახლოვდება — 20 მატჩში გუნდს 24 ქულა აქვს და მე-8 პოზიციაზეა.
