ხორვატიის ნაკრებისა და მილანის ლეგენდარულმა ნახევარმცველმა, ლუკა მოდრიჩმა კლუბში საკუთარ მომავალზე ისაუბრა, ვინაიდან მისი მიმდინარე კონტრაქტი დასასრულს უახლოვდება.
მიუხედავად იმისა, რომ ფეხბურთელი უკვე 40 წლისაა, ის მასიმილიანო ალეგრის გუნდისთვის კვლავ საკვანძო ფიგურად რჩება.
მოდრიჩი იტალიურ გუნდს 2025 წლის ზაფხულში, მადრიდის რეალში გატარებული ეპოქალური კარიერის დასრულების შემდეგ, თავისუფალი აგენტის სტატუსით შეუერთდა. მის ხელშეკრულებაში არსებობს პუნქტი, რომელიც კონტრაქტის კიდევ ერთი წლით გახანგრძლივებას ითვალისწინებს. Sportmediaset-თან საუბრისას მან აღნიშნა, რომ მილანში ბედნიერია, თუმცა ამ ეტაპზე მთელი ყურადღება კალიარისთან მოახლოებულ მატჩსა და ჩემპიონთა ლიგის საგზურის მოპოვებაზე აქვს გადატანილი.
მილანში იმიტომ გადმოვედი, რომ გუნდს ტიტულების მოგებაში დავეხმარო. წელს ეს ვერ მოხერხდა, თუმცა ძალიან მინდა, ამ კლუბთან ერთად თასი მაინც აღვმართო
ვეტერანი პლეიმეიკერი მოედანს ამ უქმეებზე სპეციალური დამცავი ნიღბით უბრუნდება, რადგან მანყვრიმალის ძვლის მოტეხილობის გამო ოპერაცია ჩაიტარა. მიუხედავად იმისა, რომ ნიღბის გამო მას სუპერგმირებს ადარებენ, მოდრიჩი ამბობს, რომ თავს ჩვეულებრივ ადამიანად გრძნობს და 40 წლის ასაკში ასეთ მაღალ დონეზე თამაშის საიდუმლო არა ზებუნებრივ ძალებში, არამედ დისციპლინაში, სწორ ძილსა და ფეხბურთისადმი უდიდეს სიყვარულშია. მიმდინარე სეზონში მან მილანის მაისურით ყველა ტურნირზე 36 მატჩი ჩაატარა, სადაც 2 გოლი გაიტანა და 3 საგოლე გადაცემა შეასრულა.
