ბუდაპეშტში გამართული ჩემპიონთა ლიგის დრამატული ფინალის ყველაზე დასამახსოვრებელი და ემოციური მომენტი პარი სენ-ჟერმენის საჩემპიონო ზეიმს მიღმა დაფიქსირდა.
მატჩისშემდგომ პენალტების სერიაში, ლონდონის არსენალის მცველის, გაბრიელის გადამწყვეტი აცილების შემდეგ, პარიზელებმა ტიტულის დაცვა აღნიშნეს, თუმცა გამარჯვებულთა კაპიტანმა, მარკინიოსმა, სულ სხვაგვარად იმოქმედა.
ნაცვლად იმისა, რომ თანაგუნდელებთან ერთად გამარჯვება ეზეიმა, მარკინიოსი მოედანზე გაჩერდა, განადგურებულ გაბრიელთან გაიქცა და ბრაზილიის ნაკრებში თავისი მეწყვილე გულში ჩაიკრა. სანამ არსენალის ფეხბურთელები თანაგუნდელის სანუგეშებლად მივიდოდნენ, მარკინიოსი მას რამდენიმე წამის განმავლობაში ეხუტებოდა და ამხნევებდა.
მოგვიანებით, მადრიდის რეალის ყოფილი მცველისა და არსენალის ამჟამინდელი კაპიტნის, მარტინ ედეგორის მხრიდან ამ ჟესტს დიდი შეფასება მოჰყვა:
ის ნამდვილი ჯენტლმენია. მოედანზე ალბათ ყველაზე გამოცდილი ფეხბურთელი იყო, რომელსაც კარიერაში მსგავსი მომენტები ორივე მხრიდან გამოუცდია. უდიდეს პატივს ვცემ ამ ჟესტისთვის და ზოგადად იმისთვის, თუ როგორი პიროვნება და მოთამაშეა
ეს ემოციური მომენტი კიდევ უფრო მნიშვნელოვანია იმ ფონზე, რომ სულ მალე, 11 ივნისს, მსოფლიო ჩემპიონატი იწყება. მარკინიოსი და გაბრიელი კარლო ანჩელოტის ბრაზილიის ნაკრების დაცვის ხაზის მთავარი საყრდენები იქნებიან და 12 ივნისს, მაროკოსთან მატჩით, მეექვსე ტიტულისთვის ბრძოლას ერთად დაიწყებენ.
რაც შეეხება უშუალოდ მატჩს, ფინალი ლონდონელებისთვის იდეალურად დაიწყო - კაი ჰავერცმა მე-6 წუთზევე გაიტანა და ჩემპიონთა ლიგის ისტორიაში პირველი გერმანელი გახდა, ვისაც გოლი ორ სხვადასხვა ფინალში აქვს გატანილი. თუმცა, 65-ე წუთზე უსმან დემბელემ პენალტით გაათანაბრა, თერთმეტმეტრიანების სერიაში კი პარიზელებმა 4:3 იმარჯვეს და ევროპის ჩემპიონები ზედიზედ მეორედ გახდნენ.
