პარი სენ-ჟერმენის ახალგაზრდა ტალანტი, იბრაჰიმ მბაიე, ინგლისურ გრანდებს - ლივერპულსა და მანჩესტერ სიტის შესთავაზეს.
18 წლის სენეგალელი ფორვარდის აგენტებმა აქტიურად დაიწყეს ევროპის წამყვან კლუბებთან დაკავშირება მას შემდეგ, რაც მოთამაშის მხარემ ასტონ ვილაში შესაძლო ტრანსფერზე უარი განაცხადა, რადგან ფეხბურთელის მიზანი ისეთი გუნდის პოვნაა, რომელიც მუდმივად იბრძოლებს შიდა თუ საერთაშორისო ტიტულებისთვის.
მბაიე პსჟ-ის ერთ-ერთ ყველაზე პერსპექტიულ ახალგაზრდა ფეხბურთელად ითვლება, თუმცა მისი წარმომადგენლები თვლიან, რომ პარიზიდან წასვლა და პირველ გუნდში რეგულარული სათამაშო პრაქტიკის მიღება მის განვითარებას შეუწყობს ხელს.
მიუხედავად იმისა, რომ ლივერპულმა და მანჩესტერ სიტიმ ინფორმაცია მიიღეს მისი ხელმისაწვდომობის შესახებ, მხარეებს შორის ოფიციალური მოლაპარაკებები ჯერ არ დაწყებულა.
