ევროპის 21-წლამდე ჩემპიონატის ჯგუფური ეტაპის მე-3 ტურში საქართველოს ნაკრები პორტუგალიას დაუპირისპირდა.
შეხვედრა ჩვენი გუნდისთვის მძიმედ დაიწყო, მე-5 წუთზე რამაზ სვანაძის გუნდი კაცნაკლული დარჩა. მსაჯმა უხეშობისთვის პირდაპირ წითელი ბარათი ლაშა ოდიშარიას უჩვენა.
24-ე წუთზე ვითარება კიდევ უფრო დამძიმდა და ფლანგიდან როდრიგო პინეიროს დარტყმის შემდეგ, ლუკა ხარატიშვილმა არადამაჯერებლად ითამაშა, რის შედეგაც ანგარიში გაიხსნა და პორტუგალიამ პირველი ტაიმი 0-1 მოიგო.
მეორე ტაიმში 10-კაციან საქართველოს ნაკრები სასწაულის იმედად იყო დარჩენილი, თუმცა ეს სასწაული არ მოხდა და პორტუგალიელებმა დამაჯერებელი გამარჯვება მოიპოვეს.
62-ე წუთზე სხვაობა ორამდე ჯოვანი კენდამ გაზარდა, მატჩის ბოლოს კი ჩვენმა მეტოქემ თავის მონაგარს კიდევ 2 გოლი დაუმატა - 87-ე წუთზე როდრიგო გომეშმა გამოიჩინა თავი, კომპენსირებულ მე-5 წუთზე კი ენრიკე არაუხომ პენალტის საშუალებით დააფიქსირა თამაშის საბოლოო ანგარიში 0-4.
საქართველოს ჯგუფიდან გასასვლელად ამ მატჩში მხოლოდ გამარჯვება სჭირდებოდა, შესაბამისად სვანაძის გუნდისთვის სლოვაკეთში მიმდინარე ევროპის ჩემპიონატი დასრულდა.
U21 გუნდმა პირველ ტურში პოლონეთთან მოპოვებული 3 ქულით ჯგუფში მე-3 ადგილი დაიკავა, პლეიოფში კი პორტუგალია და საფრანგეთი გავიდნენ, რომელთაც 7-7 ქულა დააგროვეს. პოლონელებმა კი ტურნირი 0 ქულით დაასრულეს.
