UFC-ის სუპერმსუბუქი წონის წემპიონ მერაბ დვალიშვილს შეუძლია თავის კოლექციას კიდევ ერთი მიღწევა დაამატოს.
მიუხედავად იმისა, რომ ESPN-ის ESPY დაჯილდოების ცერემონია რამდენიმე დღეში გაიმართება, UFC-მ უკვე გაავრცელა ნომინანტებისა და გამარჯვებულის ვინაობა UFC-ის წლის მებრძოლის ჯილდოზე.
UFC Nashville-ის ტრანსლაციის დროს გამოცხადდა, რომ წლის მებრძოლი სწორედ მერაბ დვალიშვილი გახდა.
სხვა ნომინანტები UFC-ის მსუბუქი წონის ყოფილი ჩემპიონი ისლამ მახაჩევი, ქალთა სუპერმსუბუქი დივიზიონის ჩემპიონი კაილა ჰარისონი და საშუალო წონის ჩემპიონი დრიკუს დუ პლესი იყვნენ.
დვალიშვილი ნომინანტებს შორის ერთადერთია, რომელმაც 3 სატიტულო ბრძოლა მოიგო 2024 წლის 1 ივლისიდან 2025 წლის 20 ივნისამდე, რა პერიოდის მიხედვითაც გადაეცემა ჯილდოები.
მერაბმა სექტემბერში UFC 306-ზე შონ ო'მალისთან მოიპოვა ტიტული, UFC 311-ზე უმარ ნურმაგომედოვი დაამარცხა, UFC 316-ზე კი ისევ ო'მალისთან დაიცვა ქამარი.
მისი სავარაუდო მომდევნო მეტოქე კორი სენდჰეგენია, რომელსაც დიდი ალბათობით, შემოდგომაზე დაუპირისპირდება.
UFC-ის კომენტატორების თქმით, მსუბუქი წონის ახალი ჩემპიონი ილია თოფურია ნომინირებული დროის გამო არ იყო, რადგან მან დედლაინიდან ერთი კვირის შემდეგ მოიპოვა ტიტული.
