მერაბის მხარდაჭერაზე, შემართებაზე, ქამრისკენ გზაზე - ექსკლუზიური ინტერვიუ რომან დოლიძესთან

UFC-ის ქართველი მებრძოლი, რომან დოლიძე მერაბ დვალიშვილის მხარდასაჭერად ნიუ ჯერსიში ჩავიდა. ბრძოლის წინ რომანს გავესაუბრეთ.

- რომან, შენი და მერაბის მხარდაჭერა ძალიან სამაგალითოა ამ სპორტში. შენს სიტყვებს მოვიშველიებ: "არცერთი ნაბიჯი უკან" ამას გავს ეს ყველაფერი. შეგიძლია მეტი გვითხრა ამის შესახებ?

- პირიქით, ვერაფერ განსაკუთრებულს ამაში ვერ ვხედავ. მე ვფიქრობ, რომ ეს ასეც უნდა იყოს. ჩვეულებრივი ამბავია, ერთმანეთის გვერდით უნდა ვიდგეთ. რა თქმა უნდა, ერთად ვართ ძლიერი და როგორც ყოველთვის, ძალა ერთობაშია.

- როგორი შემართებით ხარ ამ ბრძოლის წინ?

- ძალიან ადვილია, როცა ერთხელ უკვე მოგებული გაქვს ბრძოლა და შემდეგ ემოციურად მზად უდგები ამ ყველაფერს, ამიტომ მეც წყნარად ველოდები ბრძოლას და დარწმუნებული ვარ ჩვენს გამარჯვებაში. ვიცი, რომ მერაბი ყველაფერს გააკეთებს გამარჯვებისთვის.

- შენი ბრძოლაც ჩანიშნულია აგვისტოში, ველოდებით ყველანი, მზად ვართ და გგულშემატკივრობთ, ჩამოხვედი და აპირებ, რომ ახლა დაიწყო შენი კემპიც, ხომ?

- დიახ, ეს მეორე ბრძოლაა ასე ემთხვევა, წინაზე ჩამოვედი და მერაბის ბრძოლის დღეს მივიღე მეც ბრძოლა, აქ როცა გადავწყვიტე მერაბთან ჩამოსვლა და ბილეთებიც უკვე ვიყიდე, ისევ კონტრაქტი მომივიდა, თავისებური დამთხვევაა უკვე მეორეჯერ, როდესაც მერაბის ბრძოლისთვის ვემზადები და მეც ვღებულობ ბრძოლას.

აგვისტოში იქნება საღამოს მთავარი ბრძოლა, საქართველოს დროით 10 აგვისტოა. ძალიან დიდი ბრძოლაა ჩემთვის, ძალიან კარგი ოპონენტია და დიდი ნაბიჯია, რომ ქამართან ახლოს მივიდე.

- ბოლო პერიოდში შენი რეზიუმე იმედის მომცემია. გვისაუბრია, რომ შენს წონაში ისეთი მდგომარეობაა, ნებისმიერ დროს შეიძლება რაღაც მოხდეს. შენი მენტალიტეტიც ამჟამად ასეა განწყობილი?

- მართალია, ყველა ბრძოლა ერთი ნაბიჯით მაახლოებს ქამართან. ვიტაკერთან იყო დაგეგმილი, მთავაზობდნენ 2 თვის განმავლობაში, მეუბნებოდნენ, რომ ვიტაკერს უნდა დაველოდო, მაგრამ რატომღაც მან სხვა ოპონენტი აირჩია. ჩემთვის მთავარია გამარჯვება და ყველაფერს გავაკეთებ ამისთვის.

- გულშემატკივრებს რას ეტყოდი?

- დიდი მადლობა საქართველო, ჩემთან ერთად ხარ, ჩემს გულში ხარ და ვგრძნობ თქვენს თანადგომას.

8 ივნისს (მეინ ქარდი 06:00 საათიდან), UFC 316-ზე მერაბ დვალიშვილისა და შონ ო'მალის საჩემპიონო რემატჩი შედგება.

რომან დოლიძე კი 10 აგვისტოს საშუალო წონის დივიზიონში ენტონი ერნანდესს დაუპირისპირდება.

VIDEO: ბოლო პირისპირ დგომი ბრძოლამდე - დვალიშვილი vs ო'მალი 2