მესი ტურის საუკეთესო მოთამაშედ დასახელდა

ლიონელ მესიმ გადამწყვეტი როლი ითამაშა ინტერ მაიამის დრამატულ გამარჯვებაში მე-8 ტურში, რამაც მას MLS-ის ტურის საუკეთესო მოთამაშის წოდება მოუტანა.

მესიმ დუბლი შეასრულა. გაიტანა გამარჯვების გოლი 79-ე წუთზე, რითიც მაიამი კოლორადო რაპიდსთან 3:2 გამარჯვებამდე მიიყვანა. მატჩს 75,824 მაყურებელი დაესწრო, რაც MLS-ის ისტორიაში ერთ თამაშზე დასწრების მეორე ყველაზე მაღალი მაჩვენებელია.

VIDEO: მესის დუბლი და 905-ე გოლი კარიერაში

MLS-ის ორგზის MVP-ის მფლობელს ამ სეზონში 7 მატჩში 7 გოლი აქვს გატანილი, რითაც ის ოქროს ბუცის რბოლაში მეორე ადგილს იყოფს.

ამ დუბლით, ლეგენდარულ არგენტინელ ათიანს თავის პირველ 60 მატჩში უკვე 18 ისეთი თამაში დაუგროვდა, სადაც ერთზე მეტი გოლი გაიტანა, ხოლო 28 შეხვედრაში მინიმუმ ორ საგოლე მოქმედებაში მიიღო მონაწილეობა.

ეს უკვე მე-14 შემთხვევაა მის კარიერაში, როდესაც მესი MLS-ის ტურის საუკეთესო მოთამაშედ დასახელდა და მეორე ჯილდო ამ სეზონში. ამ მაჩვენებლით ის გაუთანაბრდა ჯეფ კანინგემს და ლიგის ისტორიაში მეორე ადგილს იკავებს, მხოლოდ ლენდონ დონოვანის (19 ჯილდო) შემდეგ.

ინტერ მაიამი მოედანს ამ კვირაში ორჯერ დაუბრუნდება – პირველად ოთხშაბათს, სტუმრად რეალ სოლტ ლეიკთან, ხოლო შაბათს საკუთარ მოედანზე ნიუ ინგლენდ რევოლუშენს დაუპირისპირდება.

ტურის საუკეთესო მოთამაშეს რეგულარული სეზონის ყოველ ტურში მედიისა და გულშემატკივრების გამოკითხვით ირჩევენ. ხმების 75 პროცენტს ჟურნალისტთა პანელი ადგენს, ხოლო დარჩენილ 25 პროცენტს ინსტაგრამზე ფანების ხმები განსაზღვრავს.