ავსტრიის ნაკრები მსოფლიო ჩემპიონატის წინ სერიოზულად გაძლიერდა.
ფიფამ ოფიციალურად დაადასტურა ორი პერსპექტიული ახალგაზრდის უფლება, ითამაშონ ავსტრიის სახელით. საუბარია ფეხბურთელებზე, რომლებიც აქამდე ინგლისისა და გერმანიის ახალგაზრდულ ნაკრებებში გამოდიოდნენ. რალფ რანგნიკის გუნდისთვის ეს დიდი უპირატესობაა, რადგან ავსტრია 1998 წლის შემდეგ პირველად ითამაშებს მუნდიალზე, სადაც მათი ერთ-ერთი მეტოქე მოქმედი ჩემპიონი არგენტინა იქნება.
ერთ-ერთი მათგანი ბორუსია დორტმუნდის 22 წლის გარემარბი, კარნი ჩუკვუემეკაა. მანამდე ის ინგლისის 17, 18, 19 და 20 წლამდე ნაკრებებში თამაშობდა, თუმცა ლი კარსლის გაწვრთნილ 21 წლამდელთა გუნდში, რომელმაც ბოლო ორი ევროპის ჩემპიონატი მოიგო, აღარ გამოჩენილა. ჩუკვუემეკა ავსტრიაშია დაბადებული, თუმცა მშობლების გამო ნიგერიის ნაკრებში თამაშის უფლებაც ჰქონდა. გერმანულ კლუბში გადასვლამდე ის ასტონ ვილასა და ჩელსის ღირსებას იცავდა.
მასთან ერთად ავსტრიის ფორმას მოირგებს პსვ-ს 20 წლის ნახევარმცველი, პაულ ვანერი. ფიფამ ორშაბათს დააკმაყოფილა მისი მოთხოვნა გერმანიის ახალგაზრდული გუნდიდან ავსტრიაში გადასვლის შესახებ. ვანერიც ავსტრიაშია დაბადებული. ის ბაიერნ მიუნხენის აკადემიის აღზრდილია, გასული სეზონი იჯარით ჰაიდენჰაიმში გაატარა, ახლა კი პსვ-ში 10-ნომრიანი მაისურით თამაშობს. ორივე ფეხბურთელის დებიუტი, სავარაუდოდ, მარტის ამხანაგურ მატჩებში შედგება, როდესაც ავსტრია განასა და სამხრეთ კორეას უმასპინძლებს.
ავსტრიის ნაკრები მსოფლიო ჩემპიონატზე ასპარეზობას 16 ივნისს, იორდანიასთან მატჩით დაიწყებს. ამის შემდეგ რანგნიკის გუნდი არგენტინას და ალჟირს დაუპირისპირდება.
მანჩესტერ იუნაიტედის ყოფილი მწვრთნელი საბოლოო შემადგენლობას სეზონის ბოლოს დაასახელებს. ჩუკვუემეკა და ვანერი იმედოვნებენ, რომ რანგნიკის გეგმებში მოხვდებიან და ზაფხულში, ფეხბურთის ყველაზე დიდ ფორუმზე, ლიონელ მესისა და მისი გუნდის წინააღმდეგ თამაშის შანსი მიეცემათ.
