ბარსელონას პრეზიდენტობის კანდიდატმა, ჟოან ლაპორტამ, ესპანეთის თასის პირველ ნახევარფინალში ატლეტიკოსთან განცდილი მძიმე მარცხის (0:4) შემდეგ გუნდს მხარდაჭერა გამოუცხადა.
„სრულ მხარდაჭერას ვუცხადებ ჰანსი ფლიკს, მოთამაშეებს, დეკუს და მის გუნდს. დარწმუნებული ვარ, რომ ყველა „კულეს“ დახმარებით, ჩვენ გვაქვს ისტორიული შესაძლებლობა, 3 მარტს სპოტიფაი კამპ ნოუზე დიდი „რემონტადა“ მოვაწყოთ.
სამწუხაროდ, გუშინ უსიამოვნებების მთელ სერიას შევეჩეხეთ — დაწყებული მინდვრის საფარის ცუდი მდგომარეობით, დასრულებული უსამართლოდ გაუქმებული გოლით, რომელმაც ქამბექის დაწყების საშუალება არ მოგვცა. თუმცა, ეს შესაძლებელია საპასუხო მატჩში, თუ ყველანი ერთად დავუდგებით გუნდს გვერდით, როგორც იმ დიდ ეპიკურ საღამოებში, რომლებიც ჩვენს სტადიონზე გამოგვივლია.
რაც შეეხება პაუ კუბარსის გაუქმებულ გოლს, ეს უკვე აღარ არის პირველი მსგავსი შემთხვევა — ის გვახსენებს ლამინ იამალის გოლს, რომელიც ასევე შეცდომით გააუქმეს ანოეტაზე (სოსიედადთან მატჩში). შემთხვევით არაფერი ხდება. სწორედ ამიტომ, ჩვენ უნდა ვიბრძოლოთ ყველაფრისა და ყველას წინააღმდეგ.
ახლა, როგორც არასდროს, მნიშვნელოვანია ჩვენი ფეხბურთელების გვერდით დგომა. მივმართავ კლუბის წევრებსა და ყველა გულშემატკივარს: აგრძნობინეთ მათ ჩვენი სიყვარული და ის, თუ როგორ ვამაყობთ იმით, როგორ იცავენ ისინი ჩვენს ფერებს.
გაუმარჯოს ბარსას და გაუმარჯოს კატალონიას!“ – დაწერა ლაპორტამ, რომელიც ბარსელონას საპრეზიდენტო არჩევნებში მონაწილეობს.
