ხავიერ მასკერანომ ინტერ მაიამის თეთრ სახლში ვიზიტსა და მესის მოახლოებულ რეკორდზე ისაუბრა.
ინტერ მაიამის მთავარმა მწვრთნელმა, ხავიერ მასკერანომ, მედიასთან ინტერვიუში გუნდის გარშემო არსებულ აჟიოტაჟზე ისაუბრა. მთავარი ყურადღება ხუთშაბათს თეთრ სახლში გამართულ მიღებას დაეთმო, სადაც აშშ-ის პრეზიდენტმა, დონალდ ტრამპმა, 2025 წლის MLS-ის ჩემპიონები მიიღო.
ლიონელ მესი და მისი თანაგუნდელები თეთრი სახლის აღმოსავლეთ დარბაზში ჩემპიონის ტიტულის აღსანიშნავად მიიწვიეს.
ჩვენ უბრალოდ ტრადიციული პროტოკოლი დავიცავით, რომელიც ჩემპიონი გუნდების თეთრ სახლში ვიზიტს ითვალისწინებს. პრეზიდენტ ტრამპთან კონტაქტი ზუსტად ისეთივე იყო, რაც ტელევიზიით ნახეთ.. მეტი არაფერი.
ინტერ მაიამის სეზონის დასაწყისი საკმაოდ რთული გამოდგა, მათ პირველი ხუთი მატჩის ჩატარება სტუმრად უწევთ. მასკერანოს თქმით, ხშირი მოგზაურობა გუნდურ სულისკვეთებას აძლიერებს:
ამ დროს ფეხბურთელები მეტ დროს ატარებენ ერთად, რაც მაიამიში, ყოველდღიურ ცხოვრებაში ნაკლებად ხდება. ეს გვეხმარება, რომ გუნდში კარგი ატმოსფერო შევინარჩუნოთ.
ყველაზე დიდი მოლოდინი მაინც ლეო მესის უკავშირდება. ორლანდო სიტისთან შესრულებული დუბლის შემდეგ, არგენტინელს კარიერაში 898 გოლი დაუგროვდა. მას მხოლოდ 2 გოლი აშორებს 900-იან ნიშნულს, რომელსაც აქამდე მხოლოდ კრიშტიანუ რონალდუმ მიაღწია.
საინტერესოა სტატისტიკური შედარება: რონალდუმ 900 გოლს 39 წლის ასაკში, 1238 მატჩში მიაღწია. მესი კი ამჟამად 38 წლისაა და მხოლოდ 1149 შეხვედრა აქვს ჩატარებული.
ციფრები, რომლებსაც ახსენებთ, დაუჯერებელია. მე უბრალოდ პრივილეგირებული მაყურებელი ვარ, რომელიც მას გვერდიდან აკვირდება.
შემდეგ მატჩს ინტერ მაიამი შაბათს, ბალტიმორში, D.C. United-ის წინააღმდეგ გამართავს. თუ მესი ამ შეხვედრაში დუბლს შეასრულებს, ის ოფიციალურად გახდება მეორე ფეხბურთელი ისტორიაში, ვინც 900-გოლიან ბარიერს გადალახავს.
