საქართველოს ეროვნული ლიგის 28-ე ტურში იბერია 1999 ტყიბულის მეშახტეს დაუპირისპირდება. მატჩი შაბათს, 10 ოქტომბერს, 15:30-ზე წყალტუბოში გაიმართება.
ჩემპიონატის დასრულებამდე 9 ტურით ადრე გათამაშების ცხრილი შემდეგნაირად გამოიყურება:
ეს წლევანდელ სეზონში იბერიასა და მეშახტეს მეოთხე დაპირისპირებაა - წინა სამ წრეში გამართული შეხვედრებიდან მოქმედმა ჩემპიონმა ორი მოიგო, ხოლო ერთში ფრედ ითამაშა.
პირველი წრის შეხვედრა თბილისში 11 აპრილს გაიმართა და ფრედ 2:2 დასრულდა. დედაქალაქური კლუბიდან გოლები ამირან ძაგანიამ და გუნდის კაპიტანმა, გიორგი ჯინჯოლავამ გაიტანეს. თორნიკე მეგრელიშვილის კარი კი იბერიას ყოფილმა ფეხბურთელმა ირაკლი სიხარულიძემ და მეშახტეს ბრაზილიელმა ლეგიონერმა ერიკ პიმენტელმა აიღეს.
მეორე წრის მატჩში წყალტუბოში შოუ ვახტანგ ბედოშვილმა დადგა - იბერიამ მეშახტე 4:1 დაამარცხა, 22 წლის შემტევმა კი ტყიბულელთა კარი სამჯერ აიღო. თბილისელთაგან კიდევ ერთი გოლი პაატა ღუდუშაურმა გაიტანა, მეგრელიშვილს კი კვლავ სიხარულიძემ აჯობა.
გუნდების უკანასკნელ დაპირისპირებაში, რომელიც 23 ივნისს თბილისში გაიმართა, მთავარ მოქმედ პირებად კვლავ ნაცნობი გმირები მოგვევლინენ. სიხარულიძემ ამჯერად მაკარიძეს გაუტანა პენალტის ნიშნულიდან, ბედოშვილმა და ღუდუშაურმა კი ორ-ორი ყვითელი ბარათი მიიღეს და იბერიამ მატჩი ცხრა კაცით დაასრულა. მიუხედავად ამისა, ნიკოლოზ დადიანისა და ვაჰიდ სელიმოვიჩის გოლებით იბერიამ მატჩის მოგება მაინც შეძლო.
ზედიზედ სამი მოგების შემდეგ, იბერია წინა ტურში თბილისის დინამოსთან დამარცხდა, ტყიბულის მეშახტე კი ბოლო ოთხი მატჩია მოუგებელია. შეგახსენებთ, იბერიასა და მეშახტეს დაპირისპირება შაბათს, 10 ოქტომბერს, 15:30-ზე წყალტუბოში გაიმართება.
