მერაბ დვალიშვილი პიოტრ იანთან მესამე ბრძოლაზეა კონცენტრირებული, თუმცა უკვე იცის, ვისთან სურს შეხვედრა საჩემპიონო ქამრის დაბრუნების შემთხვევაში.
ქართველმა მებრძოლმა მომდევნო მეტოქედ სონგ იადონგი დაასახელა.
დვალიშვილი და იანი 24 ოქტომბერს, აბუ-დაბიში, UFC 333-ზე სუპერმსუბუქი წონის ტიტულისთვის იბრძოლებენ. მათ პირველ შეხვედრაში მერაბმა გაიმარჯვა, მეორეში კი იანმა - ორივეჯერ მსაჯების ერთსულოვანი გადაწყვეტილებით.
„პირველ რიგში, იანზე ვარ კონცენტრირებული და ამ ბრძოლის მოგება მინდა. ქამარზე მეტად მომდევნო მეტოქის დამარცხება მსურს.
ქამარი ამას თავისთავად მოჰყვება. მინდა საუკეთესო მებრძოლს ვაჯობო, ამ შემთხვევაში კი ეს პიოტრ იანია“, - უთხრა დვალიშვილმა MMA Junkie-ს.
მერაბის თქმით, მესამე დაპირისპირების შედეგი მომდევნო სატიტულო ბრძოლის მონაწილეებსაც განსაზღვრავს.
„თუ მოვიგებ, შემდეგი სონგ იადონგი იქნება. ერთმანეთთან არასდროს გვიბრძოლია, ის სახიფათოა და ვიცით, რომ ნოკაუტის ძალა აქვს.
თუ იანი მოიგებს, მაშინ შონ ო’მალი იქნება, რადგან მათ საკუთარი ისტორია აქვთ. ამჯერად ყველაფერი მარტივია, თუმცა ვფიქრობ, სონგ იადონგმა მომზადება უნდა დაიწყოს“, - განაცხადა ქართველმა.
ჩინელ მებრძოლს ზედიზედ ორი გამარჯვება აქვს - მან დეივეზონ ფიგეირედო და უმარ ნურმაგომედოვი მეორე რაუნდში დაამარცხა.
მიუხედავად წონის წამყვან მებრძოლებს შორის ყოფნისა, იადონგს UFC-ის ქამრისთვის ჯერ არ უბრძოლია.
